Qarýly Kúshter quramynda ushqyshsyz avıatsııany damytý departamenti quryldy

ASTANA. QazAqparat – Qazaqstan Qarýly Kúshter quramynda qaladaǵy is-qımylǵa beıimdelgen bólimsheler qurylady. Bul týraly Bas shtabtyń Jedel josparlaý departamenti bastyǵynyń orynbasary Dáýren Abdýllın ortalyq kommýnıkatsııalar qyzmetinde ótken brıfıngide aıtty, dep habarlaıdy QazAqparat tilshisi.

«Ýrbanızatsııalanǵan jerlerdegi is-qımylǵa beıimdelgen bólimshelerdi qurý josparlanǵan. Desanttyq-shabýyldaý áskerleriniń jaýyngerlik múmkinshiligin arttyrý sharalary ózektendirilýde. Júzege asyrylǵan is-sharalar tez jáne batyl is-qımyldarda desanttardyń «Ámbebap» qural retindegi rólin arttyrýǵa múmkindik berdi.

Strategııalyq baǵyttardaǵy derbes toptar qurý jalǵasýda. Bul jumys shekarashylar men ulttyq ulan jáne TJM qutqarýshy komponentteriniń damýymen tyǵyz júrgizilýde», - dedi ol.

Bas shtab ókili qazirgi tańda birde-bir qarýly qaqtyǵys ushqyshsyz apparattardyń qoldanýynsyz ótpeıtinin atap ótti.

«Osy perspektıvalyq baǵytty damytý maqsatynda bizder Bas shtabta Ushqyshsyz avıatsııa keshenin damytý departamentin qurdyq.

Jedel daıyndyq sharalaryna jergilikti atqarýshy jáne ortalyq memlekettik organdaryn qatystyrý dástúrge aınalýda», - dedi Dáýren Abdýllın.