Qarýly kúshter bas shtaby adamdardy kósheden ustap, áskerge alyp ketý týraly pikir bildirdi
«Azamattardy kósheden ustap, áskerge alyp ketý derekteri kóptep tirkelýde. Sondaı-aq, densaýlyq jaǵdaıy áskerge barýǵa jaramasa da alyp ketetinin aıtyp shaǵymdanǵandar bar. Bul máseleni qalaı sheshýshe bolady? Jastardy áskerge yntalandyrý úshin mınıstrlik basqa qandaı sharalar qabyldap jatyr?», - dep suraq qoıdy tilshiler Ortalyq kommýnıkatsııalar qyzmetinde.
Oǵan QR Qarýly Kúshteriniń bas shtaby Uıymdastyrý-jumyldyrý jumystary departamentiniń ofıtseri, podpolkovnık Rýslan Tapashev jaýap berdi.
«Negizinde áskerge shaqyrýdy uıymdastyrýǵa jergilikti atqarýshy organdar jaýapty. Áskerge shaqyrý jiberilgen, biraq óz erkimen pýnktterge kelmegen adamdar bar. Sol sebepti jergilikti atqarýshy organdar tarapynan reıdtik is-sharalar uıymdastyrylady. Ol izdestirý jumystaryna jergilikti polıtsııa qyzmetkerleri tartylady. Sol sebepti munda shaqyrtý qaǵazdary boıynsha áskerge shaqyrý pýnktterine kelmegen azamattar máselesi bolyp otyr», - dedi R. Tapashov.
Sonymen birge, spıker áskerge shaqyrý boıynsha medıtsınalyq komıssııalar bar ekenin atap ótti.
«Bul komıssııalar oblys kólemindegi, respýblıkalyq mańyzy bar qala kólemindegi densaýlyq saqtaý basqarmalarynyń basshylary, orynbasarlary tarapynan júrgiziledi. Shynymen densaýlyǵynda aqaýy bar azamattardy áskerge shaqyrýǵa jol berilmeıdi. Jastardy áskerge yntalandyrý úshin tegin joǵary bilim, nesıe tólemin ýaqytsha toqtatý syndy ıgi sharalar qolǵa alynyp jatyr», - dedi Rýslan Tapashov.