Qarýly kúshterdiń áskerı qyzmetshileri úshin biryńǵaı kıim nysany engiziledi
Qoldanystaǵy kıim nysandary Memleket basshysynyń tapsyrmasy boıynsha múddeli memlekettik organdarmen birlesip qaıta óńdeldi.
Ótken jylǵy 12 jeltoqsanda Qazaqstan Respýblıkasy Prezıdentiniń 2011 jylǵy 25 tamyzdaǵy «Qazaqstan Respýblıkasy Qarýly Kúshteriniń, basqa da áskerleri men áskerı quralymdarynyń áskerı qyzmetshileriniń áskerı kıim nysany men aıyrym belgileri týraly» Jarlyǵyna ózgerister engizildi.
Áskerı qyzmetshiler qarakól jaǵaly qysqy kýrtkanyń ornyna «Alıaska» tıpti kýrtkalar kıetini habarlanǵan. Joǵary ofıtserlik quramnan ózge áskerı qyzmetshilerdiń bas kıimderi kúnqaǵarsyz bolady. Maýsymdyq kúndelikti plaş kamýflıaj tústi dalalyq kúrteshege, al kúndelikti svıter dalalyq svıterge aýystyryldy. Áskerı qyzmetshi áıelder úshin pılotkanyń ornyna kepı qarastyrylǵan.
«Joǵary ofıtserlik quramnan, Qorǵanys mınıstrligi men Bas shtabtyń qurylymdyq bólimsheleriniń, Qarýly kúshter Bas basqarmalarynyń bastyqtarynan, bas qolbasshylardan, qolbasshylardan jáne olardyń orynbasarlarynan ózge áskerı qyzmetshilerdiń barlyq sanattary úshin kıtel, shalbar, jeıdeler, galstýktar alynyp tastaldy» - delingen.
Ofıstik kıim nysany tek basqarý organdary, joǵary oqý oryndarynyń turaqty quramy, áskerı bólim komandırleri, olardyń orynbasarlary jáne áskerı qatynastar komendatýralary úshin kúndelikti kıim úlgisi bolyp aıqyndalady.
Qara tústi qonyshy uzyn báteńkemen qatar turaqty quramǵa arnalǵan qum tústi jazǵy báteńkemen qamtamasyz etý de qarastyrylǵan. Bul nusqa elimizdiń geografııalyq erekshelikterine, sondaı-aq ystyq ótkizbeıtin jáne búrkemeleý qasıetterine baılanysty.
Jańa úlgidegi dalalyq kıim-keshekke kóshý 2024 jyldyń tórtinshi toqsanyna, qalǵan zattarǵa kóshýdi úsh jyl ishinde júzege asyrý josparlanǵan.