Qarýly kúshterdiń áskerı qyzmetshisi Qabanbaı batyrdyń músinin somdady

<p><strong>Birer kún buryn Óskemen garnızony 27943 áskerı bóliminiń áskerı qyzmetshisi kapıtan Raı Orazbekov jasaǵan qazaqtyń ataqty qolbasshysy Qabanbaı batyrdyń bıýsti Sársen Amanjolov atyndaǵy Shyǵys Qazaqstan memlekettik ýnıversıtetiniń áskerı kafedrasyna tapsyryldy. <a href="Kazinform." target="_blank" rel="noopener">Kazinform</a> bul týraly <a href="https://www.gov.kz/memleket/entities/mod/press/news/details/685794?lang=kk" target="_blank" rel="noopener">Qorǵanys mınıstrligine</a> silteme jasap habarlaıdy.&nbsp;</strong></p>

Raı Orazbekov – Óskemen garnızonyndaǵy oqý-jattyǵý polıgonynyń bastyǵy. Ol bos ýaqytynda shyǵarmashylyqpen aınalysady. 

Raı Shyǵys Qazaqstan oblysynyń Zaısan qalasynda dúnıege kelgen. Sýretshiniń talanty mektep jyldarynda oıandy. Qurlyq áskerleri áskerı ınstıtýtynyń kýrsanty bolyp júrip te Raı músin jasaýdy tastaǵan joq. 

2019 jyly Raı Orazbekov Gvardeısk garnızonynan Óskemen qalasynyń 27943 áskerı bólimine aýysty. Jańa qyzmet ornynda basshylyq esimi áskerı bólimge berilgen qazaq batyry Qasym Qaısenovtiń bıýstin jasaýdy usyndy.

– Bul meniń ómirimdegi eń qyzyqty ári jaýapty sátterdiń biri boldy. Bir apta ishinde Qasym Qaısenovtyń eki músinin somdap shyqtym. Ádette mundaı jumysqa bir-eki aı ýaqyt ketedi, – dedi Raı Orazbekov.

Ekinshi dúnıejúzilik soǵysy batyrynyń bir músini garnızondaǵy dańqty jaýynger atyndaǵy murajaıǵa, al ekinshisi áskerı bólimniń kireberisindegi alleıaǵa qoıyldy.

Avtordyń «Áskerı qyzmetshilerdiń otbasy» degen taǵy bir músindik kompozıtsııasy Óskemen qalasyndaǵy áskerı qalashyq saıabaǵynda ornatylǵan. Munda serýendeýge keletinder úshin bul jer otbasylyq estelik fotosýretter túsirýge kórik berip tur.

Raı Orazbekov úshin shyǵarmashylyq – ańyzǵa aınalǵan tulǵalarǵa degen kózqarasyn erekshe tásilmen berý múmkindigi. Áskerı qyzmetke júrek qalaýymen kelgen ol úshin Otan qorǵaý jolyndaǵy mıssııa ózi somdap júrgen batyrlar beınesinen kórinis tapqandaı.