Qarýly kúshterdiń 5 myńǵa tarta áskerı qyzmetshisi sý tasqynymen kúreske jumyldyrylǵan
«Jeke quram parommen Oıyl eldi mekenine táýligine 10 reıs jasady. 43 adam, 31 jeńil kólik, sondaı-aq 8 tonna gýmanıtarlyq júk tasymaldandy. Jaıyq ózenin keńeıtý boıynsha jarý jumystary tobynyń jeke quramy 2 ret jarylys jasady. Aqmola oblysy Zarechnyı aýylynyń tirshilik etý obektilerin elektrmen qamtamasyz etý jumystary jalǵasyp jatyr. Petropavl qalasynda jáne onyń mańynda jumystar jalǵasýda. Sý basýy múmkin jerlerdi qum salynǵan qapshyqtarmen bekitý, jergilikti turǵyndardy evakýatsııalaý júrgizilýde», - dedi ol Ortalyq kommýnıkatsııalar qyzmetindegi brıfıngte.
Onyń aıtýynsha, aýmaqtyq qorǵanys brıgadalarynyń áskerı qyzmetshileri jasandy bógetti nyǵaıtý maqsatynda qaptarmen qum daıyndaý jumystaryn júrgizip jatyr.
«27 naýryz ben 11 sáýir aralyǵynda Atyraý, Aqmola, Batys Qazaqstan, Qostanaı jáne Soltústik Qazaqstan oblystarynda sý tasqynyna qarsy is-sharalarǵa Qarýly kúshterdiń 5 myńǵa tarta áskerı qyzmetshisi, 170-ten astam áskerı tehnıkasy, 11 tikushaq jáne 5 áskerı-kólik ushaǵy jumyldyryldy. 2 443 turǵyn evakýatsııalandy, túrli qyzmetterdiń 825 mamany jáne 111 myń keliden asa júk tasymaldandy. Osy aralyqta 300 myń qap qum daıyndalyp, tóseldi. Paromnyń kómegimen Oıyl aýylynyń turǵyndaryn evakýatsııalaý júrgizildi», - dedi Rýslan Jangýlın.