Qarýly kúshterde úzdik serjant anyqtaldy

<p>ASTANA. KAZINFORM — Jambyl oblysynda Qazaqstan Qarýly kúshteriniń úzdik serjanty ataǵyna oraı ótkizilgen XIV Búkilarmııalyq konkýrstyń qorytyndysy shyǵaryldy. Bul týraly Qorǵanys mınıstrliginiń baspasóz qyzmeti málim etti.</p>

Bir apta boıy «Ońtústik» óńirlik qolbasshylyǵynyń áskerı bólimderinde Qazaqstan armııasynyń eń myqty degen 118 serjanty kásibı sheberlikterin kórsetýden saıysqa tústi. Olar komanda esebinde de jarysty, oǵan qosa jeke saıysta ózderiniń sheberlikterin kórsetip baqty.

Búkilarmııalyq konkýrsqa óz óńirlerinde kóshbasshylyq qasıetterimen kózge túsken bólim komandırlerinen bastap shtab serjanttaryna deıingi jeti sanatta serjanttar qatysty. Áskerı qyzmetshiler myqtylyq, tózimdilik, tabandylyq pen maqsatqa umtylysty kórsete otyryp, bar kúsh-jigerin tanytty.

Baıqaý «Aıbyn», «Qaısar», «Kerýen», «Mergen», «Bilimpaz», «Seri» dep atalatyn alty kezeńnen turdy. Apta boıy áskerı qyzmetshiler polıgonda marsh júgirý jáne stadıonda júgirý kezinde ondaǵan shaqyrymdy artqa tastady. Atý jáne granata laqtyrýdan talaı nysanany aldy, biraz shaqyrymǵa jer baýyrlap jetti, shartty túrde urys dalasynda jaralanǵandardyń barlyǵyn qutqardy.

Foto: Qorǵanys mınıstrligi

— Búkilarmııalyq konkýrs ótkizý serjanttardy daıarlaýdy jetildirýge yqpal etip, olardy qyzmettegi jetken jetistikteri úshin jigerlendirý faktory. Qol astyndaǵylardan jaýyngerlik jáne dene shynyqtyrýda joǵary nátıjelerdi talap ete otyryp, serjanttardyń ózderi kópke úlgi bolýy kerek. Olardyń jetistikteri — serjanttardyń kásibı sheberliginiń dáleli, — dep atap ótti Qarýly kúshterdiń Bas serjanty sheber-serjant Temirbek Halyqov.

Jalpy komandalyq esepte «Ońtústik» óńirlik qolbasshylyǵynyń komandasy Búkilarmııalyq serjanttar konkýrsynyń jeńimpazy atandy. Ekinshi oryndy Desanttyq-shabýyldaýshy áskerleriniń quramasy enshiledi. Úshinshisi 14776 áskerı bóliminiń serjanttaryna buıyrdy.

Úzdik serjant ataǵyna Qazaqstan Áskerı-áýe kúshteriniń ókili (54835 áskerı bólimi), 3-synypty serjant Darhan Aslan laıyq dep tanyldy. Darhan — Halyqaralyq armııa oıyndarynyń «Beıbitshilik jaýyngeri» baıqaýynyń birneshe dúrkin qatysýshysy. Kóptegen adamdar onyń daıyndyq sapasyna tań qaldy.

— Básekelestik kúshti boldy, barlyq serjanttar jaqsy daıyndalǵan, sondyqtan jeńiske jetý ońaı bolǵan joq. Birqatar kezeńderde meniń joldastarym tamasha nátıjelerge qol jetkizdi. Jeńiske jetkenime óte qýanyshtymyn. Bul jeńisimdi ózim qyzmet etetin Áskerı-áýe kúshterine arnaımyn. Maǵan qoldaý kórsetip, sengeni úshin dostarym men áriptesterime alǵys aıtamyn, — dedi Darhan Aslan. 

Ekinshi oryndy Taldyqorǵandaǵy DShÁ desanttyq-shabýyldaý brıgadasynyń serjanty 3-synypty serjant Raýan Toqtarbekov aldy. Úshinshi oryndy Qorǵanys mınıstrligi Sh. Ýálıhanov atyndaǵy áskerı kolledjiniń atynan kelgen 3-synypty serjant Temirlan Baızýlın ıelendi.

Foto: Qorǵanys mınıstrligi

Konkýrstan tys, alaıda polıgondarda nátıjelerge qol jetkizýge tolyq jáne shynaıy umtylyspen AQSh Ulttyq ulanynyń serjanttary saıysqa tústi. Sheber-serjant Temirbek Halyqov atap ótkendeı, olardyń qatysýy áskerı qyzmetshilerge serjanttar quramyn daıarlaý ádistemelerin salystyrýǵa jáne tájirıbe almasýǵa múmkindik beredi.

XIV Búkilarmııalyq serjanttar konkýrsynyń sońy jeńimpazdardy kýboktarmen, medaldarmen jáne gramotalarmen marapattaý rásimimen aıaqtaldy. Endi jarys jeńimpazy Darhan Aslan Astanaǵa barady, onda Qorǵanys mınıstri oqý jylynyń qorytyndysy boıynsha úzdik áskerı qyzmetshilerdi marapattaıdy.

Buǵan deıin Qorǵanys mınıstrligi kámelet jasyna tolǵan azamattardyń áskerı mindetin óteý tártibin taǵy da túsindirgen edi.