Qarýly kúshter elimizdiń batys óńirinde topan sýmen qalaı kúresip jatyr

<p>ASTANA. KAZINFORM &ndash; Qorǵanys mınıstrliginiń resmı ókili Rýslan Jangýlın Ortalyq kommýnıkatsııalar qyzmeti alańynda ótken baspasóz máslıhatynda elimizdiń batys oblystarynda sý tasqynynan adamdardy qutqarý jáne topan sýmen kúres jumystary týraly aıtyp berdi.</p>

Aqtóbe oblysy 

Oıyl aýylynda quramynda 15 adamy bar ınjenerlik bólimshe Oıyl ózeni arqyly ótetin parom ótkeliniń kómegimen 238 turǵyndy evakýatsııalap, 1,5 tonnaǵa jýyq zattar men azyq-túlik tasymaldaýdy qamtamasyz etti. Odan bólek, 50 áskerı qyzmetshi sý tasqynyna qarsy is-sharalar ótkizý úshin Sadovaıa aýylyna bardy.

Atyraý oblysy

Muz jarý toby Jem ózeniniń arnasyn buzyp, keńeıtý jumystaryn júrgizdi (Qulsary qalasynan 30 shaqyrym). Eki ret muz jarý jumysy júrgizildi. Qulsary qalasynda «Batys» óńirlik qolbasshylyǵynyń 397 áskerı qyzmetshisi aýysymmen 30 000 qap qum daıyndady, Qarabaý aýylyndaǵy 50 áskerı qyzmetshi jaǵalaýdyń shetin nyǵaıtý úshin 3000 qap daıyndady. 

Batys Qazaqstan oblysy 

26 adamnan turatyn aýmaqtyq qorǵanys brıgadasynyń áskerı qyzmetshilerimen Oral qalasynyń Shaǵan aýdanynda 2 400 qap qum daıyndap, Jaıyq ózeniniń arnasyn nyǵaıtý jumystary júrgizildi. 

Mańǵystaý oblysy 

Oblys ákiminiń qaýlysyna sáıkes, 7-8 sáýirde Aqtaý qalasy Beıneý aýylynda aýmaqtyq qorǵanys brıgadasymen josparlanǵan taktıkalyq-arnaıy oqý-jattyǵý sheńberinde Atyraý oblysynyń Jylyoı aýdanyndaǵy sý tasqyny jaǵdaıyn joıýǵa tartý maqsatynda 155 áskerı mindettin óteýshi shaqyryldy. 

Qorǵanys mınıstrligi resmı ókiliniń málimetinshe, 27 naýryz ben 7 sáýir aralyǵynda topan sýmen kúreske Qarýly kúshterdiń jeke quramynan 2 357 adam, 112 áskerı tehnıka, 10 tikushaq jáne 4 ushaq birlik jumyldyryldy. Osy ýaqyt aralyǵynda jeke quram 2 305 adamdy evakýatsııalady, onyń ishinde 732 bala bar.