Qarýdy zańsyz satpaq bolǵan jambyldyq ustaldy

NUR-SULTAN. QazAqparat – «QR Іshki ister mınıstrliginiń Tergeý departamentiniń bastyǵy Sanjar Ádilov qańtar oqıǵasy kezinde urlanǵan qarý-jaraqty qaıtarý jumystarynyń nátıjesi týraly málimet berdi, dep habarlaıdy QazAqparat tilshisi.

«Іshki ister organdary urlanǵan, zańsyz saqtaýdaǵy jáne tirkelmegen qarýdy tabý men alyp qoıý boıynsha jumysty jalǵastyrýda. 1 499 qarý men 35,6 myńnan astam oq-dári tárkilendi.

Máselen, Jambyl oblysy polıtsııa departamentiniń qyzmetkerleri jedel-izdestirý sharalary kezinde oq-dárisi bar 2 «kalashnıkov» avtomatyn satpaqshy bolǵan jergilikti turǵyndy anyqtady. Kúdikti sottyń sheshimimen kúzetpen qamaýǵa alyndy», - dedi Tergeý departamentiniń bastyǵy.

Onyń málimeti boıynsha, túsindirý jumystarynyń nátıjesinde azamattar 145 qarýdy óz erkimen tapsyrǵan.

«Ótken apta ishinde ǵana Almaty oblysynda azamattar 3 tegis uńǵyly myltyqty berdi. Qabyldanǵan sharalardyń arqasynda polıtsııa qyzmetkerleri jalpy somasy 340 mln teńgeden asatyn azamattardyń múlkin taýyp, qaıtardy.

Mysaly, bıyl 5 qańtarda Almaty oblysynyń 4 turǵyny Almaty qalasynda Álimjanov kóshesindegi «Kcell» aktsıonerlik qoǵamnyń fılıalynan jalpy somasy 3 mln 555 myń teńgege 27 uıaly telefondy urlaǵan.

Kúdiktiler ustaldy jáne sottyń sanktsııasynan olarǵa kepil túrinde bultartpaý sharasy qoldanyldy.

Medeý aýdany sotynyń úkimimen olar kináli dep tanyldy jáne jaǵymdy minezdemeleri, zalaldyń ornyn toltyrǵany eskerilip, úsh jylǵa bas bostandyǵyn shekteýge sottaldy», - dedi Sanjar Ádilov.

Buǵan deıin QR ІІM Tergeý departamentiniń basshysy Sanjar Ádilov qańtar oqıǵasy kezinde ásirese úsh óńirde nysandar qatty tonalǵanyn aıtqan edi.