Qarttar sheneýnikpen daýlaspaq turmaq, ózderin de qorǵaı almaıdy - Jaqyp Asanov

ASTANA. QazAqparat - Qarttar sotta sheneýnikpen daýlaspaq turmaq, ózderin de qorǵaı almaıdy. Bul týraly búgin sot tóreligin júzege asyrýdyń 2017 jylǵy qorytyndysyna arnalǵan keńeıtilgen keńeste QR Joǵarǵy sotynyń tóraǵasy Jaqyp Asanov aıtty, dep habarlaıdy QazAqparat.

«Azamattar men memlekettik organdardyń arasyndaǵy daýlarǵa qatysty óte kóp usynys aldym. Qarańyzdarshy, adam shaǵym beredi, al onyń opponenti kim? Zańgerler shtaty men qýatty ákimshilik resýrsy bar memlekettik organ. Bul ásirese kedeılerge, qarttarǵa qatysty iste kórinip turady. Olar sheneýniktermen daýlaspaq turmaq ózderin de qorǵaı almaıdy. Al sot she? Sot taraptar bergendi ǵana baǵalaıdy. Biz shyndyqtyń túbine qazbalap jete almaımyz. Biz tek bergenderin ǵana baǵalaımyz. Bermedi me, boldy. Bizdiń odan suraýǵa odan ary quqymyz joq. 70-tegi qart pen memlekettik organnyń múmkinshiligin qalaı baǵalaýǵa bolady», - dedi ol.

Osy rette Joǵarǵy sot tóraǵasy eýropalyq elder men qazaqstandyq sottyń aıyrmashylyǵyn aıtyp berdi.

«Olarda azamattyń memlekettik organmen daýly isin qaraıtyn ákimshilik sottar bar. Shetelde basqa ereje. Sýdıanyń ózi belsendi túrde shyndyqty anyqtap, memlekettik organǵa qarsy turady. Ekinshiden, sot óz sheshiminiń oryndalýyna qatań baqylaý júrgizedi. Oryndalmaǵany úshin sheneýnikke jáne memlekettik organǵa sanktsııa salady», - dedi Jaqyp Asanov.

Onyń aıtýynsha, álemdik tájirıbe mundaı sottardyń tıimdiligin kórsetip otyr.