Qarttar kúni: Ardagerler án aıtyp, bı bıledi

JARKENT. QazAqparat – Jetisý oblysy Jarkent qalasyndaǵy aýdandyq mádenıet úıinde «Respýblıkalyq ardagerler uıymy» qoǵamdyq birlestiginiń 35 jyldyǵy aıasynda aýdan ardagerleri arasyndaǵy «Ónerim - ómirim» atty óner festıvaliniń qorytyndy kontserti bolyp ótti, - dep habarlaıdy QazAqparat.

Bul aýdandyq óner festıvali «Respýblıkalyq ardagerler uıymy» qoǵamdyq birlestigi Panfılov aýdandyq fılıalynyń tóraǵasy Toqtarbaı Ákimuly Kerimqulovtyń basshylyǵymen jáne aýdandaǵy Jarkent qalasy men 13 aýyldyq okrýgtegi bastaýysh ardagerler uıymdarynyń uıymdastyrýymen ár eldi mekende ótken.

Oǵan «Panfılov aýdany ákimdiginiń mádenıet úıi» dırektory Murat Áldıbekuly Qatýbekovtiń jetekshiligindegi óner adamdary qazylyq etken bolatyn. Sonyń nátıjesinde Taldy aýyldyq okrýginiń ónerpaz ardagerleri bas júldege ıe boldy. Al, І, ІІ, ІІІ oryndardy tıisinshe Qońyróleń aýyldyq okrýginiń, Úsharal aýyldyq okrýginiń jáne Jarkent qalasynyń ónerpaz ardagerleri ıelendi.

Sondaı-aq, bir top ónerpazǵa yntalandyrý jáne jekelegen nomınatsııalar boıynsha júldeler tapsyryldy. Barlyǵyna dıplomdar men aqshalaı syılyqtar berildi.

Aýdandaǵy árbir ónerpazdar ujymdarynan iriktelgen qorytyndy kontsertti «Respýblıkalyq ardagerler uıymy» qoǵamdyq birlestigi Jetisý oblystyq fılıalynyń tóraǵasy Ermek Kelemseıit bastap kelgen óner tarlandary tamashalap, sarapqa saldy. Munda tańdap alynǵan úzdik nómirlerdi oblystyq gala kontsertke qatystyratyndyqtaryn aıtty.

Nurádil Begimbet