Kartop pen sábiz tapshylyǵy bolmaıdy dep ýáde bere almaımyn - Serik Jumanǵarın

ASTANA. QazAqparat – QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarın 2023 jyly kókónis pen qanttyń maýsymaralyq tapshylyǵyn qalaı tejeıtinin aıtty, dep habarlaıdy QazAqparat tilshisi.

«Biz byltyrǵy qatelikterdi eskere otyryp, baǵany kóteretin eń mańyzdy degen máselelerdi anyqtadyq. Birinshiden, qys pen kóktemde, maýsym aıynda kókónisterdiń máselesi týyndaıdy. Ásirese kartop, pııaz, qyryqqabat jáne sábizben qamtamasyz etý qajet bolady. Atalǵan kókónisterdiń qazirgi qory naýryz aıynyń aıaǵyna deıin jetedi. Biz ony durys saqtap úırendik. Qazir barlyq áleýmettik kásipkerlik korporatsııalar «aınalym shemasy» aıasynda óndirýshilermen kelisimshartqa otyrdy. Al sáýir, mamyr aılarynda ne isteımiz? Shetelge baryp, Pákistan, Tájikstan, Ózbekstan óndirýshilerimen kelisimshartqa otyrdyq. Endigi qadam jergilikti atqarýshy organdardiki. Olar qarajat aýdarýy kerek. Bizdiń oıymyzsha, osy shema saýda jelileri arqyly «B2B» modelinde atqarylýy kerek», - dedi ol vedomstvonyń keńeıtilgen alqa májilisinen keıin.

Mınıstrlik bıyl jyldaǵydaı kartop tapshylyǵy bolmaý úshin Pákistan óndirýshilerimen aldyn ala kelisimshart jasalǵanyn málim etti.

«Mysaly, qańtarda Pákistan bizdi kútip otyr. Qazir olarda bizdegi jaz sııaqty klımat tur. ıAǵnı, jemis pisken shaq. Baǵa anyqtalady, sol baǵamen kelisimshartqa otyrý kerek. Tájikstanda da osyǵan uqsas jaǵdaı. Ózbekstanda endi 1-2 aıdan keıin ónim pisedi. Sonda basty maqsatymyz – osy kelisimsharttar aıasynda maýsymaralyq tapshylyq týdyrmaý», - dedi ol.

BAQ ókilderi bıyl atalǵan ónimderdiń tapshylyǵy bolmaıtynyna kepildik bar ma degen saýal qoıdy.

«Bıyl tapshylyq bolmaıdy dep eshqandaı ýáde bere almaımyn. Óıtkeni ol naqty jaǵdaıǵa baılanysty. Qazirgi tańda kúnde birdeme ózgerip jatyr. Qudaı qalasa, daǵdarystar bolmasa, árıne tapshylyq bolmaıdy dep ýáde beremiz. Sebebi biz daıynbyz – búkil kelisimsharttar daıyn, qarajat bólingen. Endi jergilikti atqarýshy organdardyń sheshimin kútip otyrmyz. Sheshimi durys bolsa, qarajat bolady. Tek shetelden erte pisetin kókenister ákelý ǵana qalady. Bul mańyzdy másele. Al qant máselesi sheshildi dep esepteımin. Júıe daıyn, qurylym daıyn. Ózimizdiń zaýyttarymyzdy shıkizatpen qamtamasyz etý qaldy. 400-450 myń tonna qant quraǵyn óńdeýge múmkindikteri bar. Sonyń esebinen qant ımportyna táýeldilik azaıady», - dedi Serik Jumanǵarın.