Kartochka arqyly jasalǵan tólemder 2,6 esege ósti – Ulttyq bank

NUR-SULTAN. QazAqparat - 2020 jyldyń qańtar-qyrkúıek aılary aralyǵynda qazaqstandyqtar 23 trln teńgege 2 mıllıardqa jýyq qolma-qol aqshasyz operatsııalar júrgizdi. Bul ótken jyldyń osy kezeńine qaraǵanda, 2,6 ese artyq. Bul týraly QR Ulttyq bankinen habarlandy.

Bank taratqan málimetterge qaraǵanda, sáýir aıynda tótenshe jaǵdaıǵa baılanysty birqatar bıznes sýbektisi jumysyn ýaqytsha toqtatty. Sol sebepti qolma-qol aqshasyz operatsııalar birshama azaıdy. Biraq mamyr aıynan bastap operatsııalardyń kólemi ortasha eseppen aı saıyn 12%-ǵa ósip otyrdy. Qolma-qol aqshany sheshý operatsııalary kerisinshe azaıyp, kartochkalarmen júrgizilgen operatsııalardyń úshten bir bóliginen aspady.

Qazirdiń ózinde ınternet-bankıng pen bankterdiń mobıldi qosymshalary arqyly júrgizilgen operatsııalardyń, ıaǵnı onlaın-operatsııalardyń úlesi ulǵaıyp keledi. Eger 2019 jyldyń 9 aıynda onlaın-operatsııalar úlesi 67% bolsa, bıyl - 81%. Ortasha eseppen alǵanda, 9 aıda onlaın túrde tólem kartochkalarymen 68 mıllıard teńgeden asa qarjyǵa 4 mıllıon tranzaktsııa júrgizilgen.

Jyl basynan-aq mobıldi bankıng aýdıtorııasy tym belsendi boldy. Qańtar aıynda ınternet-bankıngti belsendi qoldanatyndardyń sany 8 mıllıon bolsa, qyrkúıek aıynda ol 12 mıllıonǵa jetti.

«Jıi qoldanylatyn tólem kartochkalarynyń sany - 25 mıllıon. Bul kartochkanyń barlyǵyn ıeleri qyrkúıek aıynda onlaın-tólem júrgizip qana qoımaı, qolma-qol aqshany sheshý úshin de qoldandy. Bıylǵy 9 aıda qazaqstandyq bankter 12 mıllıon tólem kartochkasyn shyǵardy»,-delingen habarlamada.