Qart Kaspııden ór Altaıǵa: velosaıahatshy 4 500 shaqyrymdy júrip ótti

AQTAÝ. QazAqparat – Mańǵystaýlyq 62 jastaǵy velosaıahatshy 4500 shaqyrymdyq joldy júrip ótti. Beıneý aýdanynyń týmasy, Qazaqstannyń qurmetti qurylysshysy, kásipker, metsenat Rabbım Borashovtyń Qart Kaspııden ór Altaıǵa deıingi velosapary aıaqtalýǵa jaqyn, dep habarlaıdy QazAqparat tilshisi.

«Aqtaý – Muztaý» velosaparynyń negizgi maqsaty – atalardyń júrgen jolymen, basqan izimen júrip ótý. Qazaqtyń ulanǵaıyr dalasyn velosıpedpen sharlap, jol-jónekeı kıeli jerler men elderge soǵyp, aqqýly kóli men qańbaqty shólin óz kózimmen kórý, seziný edi. Osy arqyly ishki týrızmdi damytýǵa úles qosyp, qazaq dalasynyń keremetterin álemge pash etkim keldi. Buǵan qosa, salaýatty ómir salty men tarıhı muralarymyzdy nasıhattaýdy jón kórdim. Alshaq jatqan eldi mekenderdi ortalyqqa tas joldarmen baılanystyrýdy, jańa urpaqqa jerimizdiń keńdigi men tarıhymyzdyń baılyǵyn dáripteý sekildi mıssııalardan turady», - deıdi Rabbım Borashov.

Velosaıahatshy bul saparyn 2020 jyly bastaǵan bolatyn. Kıeli Mańǵystaýdan bastalǵan sapar Shalqar eldi mekeni arqyly Torǵaı dalasyna, Atbasar arqyly 2021 jyly Nur-Sultan qalasyna jetip toqtaǵan.

Bıyl maýsymnan qaıta jalǵastyrǵan ol Nur-Sultannan Qaraǵandy-Qarqaraly arqyly Abaı men Shákárim tarıhı-memorıaldy keshenine soǵyp, jańa oblys ortalyǵy Semeı qalasynda toqtady. Sodan soń Óskemen-Qaton-Qaraǵaı baǵytymen Berel qorǵany arqyly Qaraqólge jetti.

Saıahatshy 4 500 shaqyrymdy artqa tastap, sapardyń sońǵy máresi – ór Altaıdyń Muztaýyna da taıady. Alda 40 shaqyrymdaı jol qaldy. Rabbım Borashov ol joldy atpen júrýdi josparlap otyr.