QarMÝ oqytýshylary latyn qarpine kóshý máselesin talqylady
Semınardy E.A. Bóketov atyndaǵy Qaraǵandy memlekettik ýnıversıtetiniń dotsenti Eldos Túıte ótkizdi.
Taqyrypqa qatysty fılologııa ǵylymdarynyń doktory, professor Galına Amanbaeva, fılologııa ǵylymdarynyń kandıdattary, dotsentter Bektursyn Qalıev jáne Marhaba Tursynova baıandama jasady.
Semınarǵa ýnıversıtettiń barlyq 12 fakýltetinen oqytýshylar qatysty. Dáriskerler qazaq tiline reformalardyń tarıhı qajettiligi týyp otyrǵanyn, osy reforma arqyly Qazaqstannyń jahandyq básekege tózimdiligi artatynyn tilge tıek etti.
Latyn jazýyna kóshý qazaq tilin jańǵyrtýmen qatar, onyń ǵasyrlar boıy jınalǵan baǵa jetpes baılyǵyn molaıta túsedi. Til tek kommýnıkatsııa quraly ǵana emes, sonymen qatar ulttyq erekshelikterdi nyǵaıtý men rýhanı jańǵyrýdyń tetigi bolyp ta qyzmet atqarady.
Semınar qatysýshylarynyń aıtýynsha, jańa álipbımen sabaq ótetin til mamandaryn daıyndaý jáne oqýlyqtar jazý jumystaryna kirisý qajet. Búgingi tańda álemdegi aqparattyń basym bóligi latynsha taralyp otyr. Munyń bári aǵylshyn tilin úırenýdi jeńildetedi, sondaı-aq Qazaqstannyń álemdik aqparattyq qoǵamdastyqqa belsendi ıntegratsııalanýyna jaǵdaı jasaıdy.