Qarlyǵash Ábdijabbarova: Koronavırýstyń besinshi tolqyny naýryzda sharyqtaý shegine jetýi múmkin

ALMATY. QazAqparat – Almatyda koronavırýstyń besinshi tolqyny naýryz aıynda sharyqtaý shegine jetedi. Bul týraly onlaın brıfıng barysynda qalanyń bas sanıtarlyq dárigeri Qarlyǵash Ábdijabbarova málim etti, dep habarlaıdy QazAqparat tilshisi.

Spıkerdiń sózinshe, KVI juqtyrǵandardyń úles salmaǵy 20 jastan 40 jasqa deıingi adamdar arasynda 16,4% - ǵa jáne jasóspirimder arasynda 1,1% - ǵa kúrt ósti, bul «omıkron» shtammyna tán.

«Munyń bári «omıkron» shtamy halyq arasynda tez taralatynyn jáne kóp uzamaı «delta» shtamyn almastyratyndyǵyn kórsetedi. Biz kelesi koronavırýs tolqynynyń shyńyn osy jyldyń naýryz aıyna boljap otyrmyz,-dedi Qarlyǵash Ábdijabbarova.

Buǵan deıin ol Almatyda epıdemıologııalyq jaǵdaıdyń kúrt nasharlaǵanyn aıtqan bolatyn.