Karlagtaǵy Mamochkıno zıratynda memorıaldyq keshen paıda bolady

QARAǴANDY. QazAqparat - «Mamochkıno kladbışe» atalyp ketken zıratta jańa eskertkish paıda bolady jáne onyń aýmaǵyn abattandyrý jumystary júrgiziledi. Búgin jobany Qaraǵandy oblysynyń ákimi Erlan Qoshanov maquldady, dep habarlaıdy QazAqparat tilshisi.

Saıası qýǵyn-súrgin qurbandaryn eske alý mıtıngisinen keıin memorıaldyq keshen qandaı bolatyny jaıly aıtyldy. Sharaǵa oblys ákimi, Qazaqstan halqy Assambleıasynyń ókilderi, túrli dinı konfessııalardyń qyzmetkerleri, qýǵyn-súrgin qurbandarynyń urpaqtary men oblys turǵyndary qatysty. Mıtıng-rekvıem saıası qýǵyn-súrgin qurbandaryn eske alý kúnine arnaldy.

«Bul oryn - jaı ǵana zırat nemese qý dala emes. Bul jerde úlken terrordyń jazyqsyz qurbandary jatyr. Olardyń kópshiligi tipti alǵashqy qadamdaryn da jasaýǵa úlgermeı ketken. Biz munda qansha sábı jerlengenin bilmeımiz. Osy kúnge deıin súıekter tabylyp jatyr. Biz jáne bolashaq urpaq osyndaı qaıǵyly jaǵdaı qaıtalanbas úshin ony máńgilik esten shyǵarmaýymyz qajet. Biz elimizdegi beıbitshilik pen kelisimdi baǵalaýymyz kerek», - dedi ol.

Óńir basshysy Mamochkıno zıratynyń jańa jobasymen tanysty. Ótken jyly nysandy pasporttaý jáne ýchaskeni resimdeý júrgizildi. Bıylǵy jyly qurylys jumystary bastalady dep josparlanyp otyr.

«Biz osy jobany birneshe jyl boıy júzege asyryp kelemiz. Shyǵarmashylyq topqa sáýletshiler Qaırat Jıenbaev pen ıÝlııa Lı, músinshi Taras Kıshkarev kirdi. Jalpy, zıratty qaıta qurý ıdeıasy burynnan paıda boldy jáne jergilikti jurtshylyq bul týraly burynnan aıtqan bolatyn. Al ótken jyly oblys ákimi osy zıratty retke keltirýge tapsyrma berdi», - dedi sýretshi, joba avtorlarynyń biri Igor Bagramov.

Qaıta jańǵyrtýdan keıin zırattaǵy temir qaqpanyń ornyna músinmen bezendirilgen kireberis ornatylady. Onyń ortalyǵynda «ana qaıǵysy» monýmenti ornalasady. Tastan qashalǵan jylap turǵan áıeldiń músinin úsh jaǵynan tikenekti sym qorshaıtyn bolady. Joǵarǵy jaǵynda aq tastan jasalǵan kógershinder bolady. Bul jerden ushyp ketken, alaıda anasynan alystap ketýge qımaı turǵan balalardyń taza rýhynyń belgisi ispettes.

Sondaı-aq, zırat janynda shaǵyn ǵıbadathana salynady. Onda úsh konfessııanyń árqaısysynyń sımvoldary bar úsh kireberis bar: musylmandar, pravoslavıe jáne katolıkter. Іshki - úsh bólek bólme, olardyń árqaısysy dinı kanondarǵa sáıkes rásimdeledi. Bir qabyrǵada Quran salynǵan. Qalǵan ekeýinde ıkonalar bar. Ǵıbadathanaǵa úsh jaǵynan kirýge bolady.

Sondaı-aq, Mamochkıno molasynyń aýmaǵyn abattandyrý josparlanýda. Munda oryndyqtar, ýrnalar men shamdar ornatylady. Kelýshiler memorıaldyq keshenge ońaı jetý úshin kirme joldy retke keltiredi.

Jumys aıaqtalǵannan keıin zırat aýmaǵyn Saıası qýǵyn-súrgin qurbandaryn eske alý Dolınka murajaıynyń qaramaǵyna beredi.

«Mamochkıno kladbışe» atalyp ketken zırat Qaraǵandydan 30 shaqyrym jerde ornalasqan, bir kezderi onda qýǵyn-súrginge ushyraǵandarǵa arnalǵan Karlag eńbekpen túzeý lageri ornalasqan. 1930-1940 jyldary onda Karlagtyń túrli dertter men ashtyqtan qaıtys bolǵan tutqyndary men olardyń balalaryn jerlegen.