Qarqaralynyń tártip saqshylary qaza tapqan polıtseıdiń anasyna kómektesti

QARAǴANDY. KAzAqparat – Qarqaraly aýdanynyń polıtseıleri qaza tapqan áriptesterin eshýaqytta umytpaıdy, sondaı-aq olardyń týǵan-týystaryn da nazardan tys qaldyrmaıdy. Tártip saqshylarynyń kórsetken kómegi úshin qaza tapqan polıtseı Erlan Oralbaevtyń anasy alǵys hat jazdy, dep habarlaıdy QazAqparat tilshisi.

Qarlyǵa Sadyqtyń jalǵyz uly, zapastaǵy polıtsııa kapıtany Erlan Oralbaev 2014 jyly júrek talmasynan kóz jumǵan.

«Erlannyń otbasynda da, jumysta da alǵa qoıǵan jospary kóp edi. Alaıda, taǵdyrdyń jazýymen 33 jastaǵy jalǵyz tiregimnen aıyrylyp qaldym», - dep esine alady Qarlyǵa Alpysbaıqyzy.

Osy qańtardaǵy boran, jel jáne qalyń qar óńirdiń kóptegen aýyldarynda qıyndyq týǵyzǵany málim. Ásirese, jeke úılerde turatyn jalǵyzbasty qart adamdar, ásirese múgedekter qıyndyqqa tap boldy. Osylaısha, qalyń qardyń qursaýynda qalyp, úıinen shyǵa almaı qalǵan Qarlyǵa Alpysbaıqyzy bir kúni tańerteń aýlasy qardan tazartylyp, esigi ashylǵanyna tańqalǵanyn aıtady. Borannan keıin ol omby qardan úıden shyǵatyn esigin asha almaı, sý men azyq-túlik ákele almaı qalǵan. Qar qursaýynda qalǵan zeınetker ári qaraı ne isterin bilmeı dal bolyp otyrǵanda onyń esiginiń janyna polıtseıler kelip, aýlany tazalap, qar úıindisinen shyǵýǵa kómektesken.

«Úıden shyǵyp, aýlamyzdy kórip, máz boldym. Polıtseılerdiń mundaı kómeginen keıin tipti jylap jiberdim. Maǵan syılyq emes, osylaı kóńil bólgeni júregimdi eljiretip jiberdi», - dep jazdy Qarlyǵa Alpysbaıqyzy alǵys hatynda.

Sondaı-aq, qaza tapqan polıtseıdiń anasy Qarqaraly aýdanynyń PB bastyǵy, polıtsııa polkovnıgi Qaırat Tókishevke jáne polıtsııa maıory Dáýlet Kákibaevqa, polıtsııa aǵa leıtenanty Rashıt Abaıǵa, polıtsııa leıtenanty Azamat Qapbasqa, polıtsııa aǵa serjanty Nursultan Beısenaevqa jáne polıtsııa serjanty Jandos Bımardenovke erekshe alǵys aıtty.