Qarqaralyda úıiniń janynda áıelge shabýyl jasaǵan kúdikti ustaldy – Qaraǵandy oblysy

QARQARALY. QazAqparat - Qaraǵandy oblysynyń Qarqaraly qalasynda er adam áıelge úıiniń janynda shabýyl jasaǵan bolatyn. Búgin túnde kúdikti Qaraǵandy qalasynda quryqtaldy, dep habarlaıdy QazAqparat tilshisi.

Keshe Qarqaralyda tapa-tal túste úıiniń aýlasynda 51 jastaǵy áıelge shabýyl jasady dep kúdik keltirilgen adam Qaraǵandyda ustaldy.

«25 tamyz kúni túnde Qarqaraly aýdandyq polıtsııa bóliminiń krımınaldyq polıtsııa basqarmasy, «Arlan» arnaıy maqsattaǵy jasaǵynyń Qaraǵandy qalasynda júrgizgen birlesken jedel-izdestirý is-sharalary barysynda, Qarqaraly aýdany turǵynyna shabýyl jasady degen kúdikpen 30 jastaǵy azamat ustaldy. Ol oblystyq Polıtsııa departamentine jetkizildi», - dep málimdedi Qaraǵandy oblysynyń PD Baspasóz qyzmeti.

Qazirgi ýaqytta aldyn ala tergeý amaldary júrgizilýde. Qylmyskerdiń nelikten shabýyl jasaǵanyn anyqtap jatyr.