Qarqaralyda Uly dala anasyna arnalǵan eskertkish ashyldy

QARAǴANDY. QazAqparat - Qarqaraly qalasyna kire beriste Uly dala anasy dep atalatyn Qarqabat anaǵa eskertkish ornatyldy. Ashylý saltanatyna Qaraǵandy oblysynyń ákimi Jeńis Qasymbek, qoǵam qaıratkerleri, shyǵarmashylyq zııaly qaýym jáne t. b. qatysty, dep habarlaıdy oblystyq ákimdiktiń baspasóz qyzmeti.

Monýment qoladan jasalǵan, onyń bıiktigi tuǵyrmen birge 7,5 metrdi quraıdy. Músinniń avtory – Beıbit Mustafın. Eskertkishtiń ornatylýyna Ortalyq Qazaqstan Akademııasynyń rektory Baqtybaı Júnisov bastamashy boldy.

Qaraǵandy oblysynyń ákimi Jeńis Qasymbek eskertkishtiń ashylýynda Qarqabat ana – halyq birligin, patrıotızmdi jáne parasattylyqty bildiretin nyshandarynyń biri ekenin atap ótti.

– Qarkabat ana barlyq analardyń uly anasy dep atalady. Ol qazaq dalasyndaǵy analardyń barlyq jaqsy qasıetterin, búkil halyqtyń anasyn beıneleıdi. Qarqabat-ananyń danalyǵy, ómir joly men beınesi óskeleń urpaq úshin úlgi bolady, – dedi Jeńis Qasymbek.

Ańyz boıynsha, Qarqabat ananyń kenje uly Bolatkoja Qarakesek dep atalyp ketken.

– Qazaq halqynyń tarıhynda iz qaldyrǵan uldardyń (uly Qazybek bıden bastap batyr-ǵaryshker Toqtar Áýbákirovke deıin) anasynyń esimi eshqashan umytylmaıdy. Bul eskertkish bolashaq urpaqty tárbıeleý úshin qajet, – dep atap ótti QR Jazýshylar odaǵynyń tóraǵasy Ulyqbek Esdáýlet.