Qarqaralyda Toqtar Áýbákirovtiń mereıtoıy atalyp ótildi (FOTO)

QARAǴANDY. QazAqparat - Qaraǵandy oblysynyń Qarqaraly aýdanynda - ataqty jerlesteri, Qazaqstannyń tuńǵysh ǵaryshkeri Toqtar Áýbákirovtiń 70-jyldyǵy men onyń alǵashqy ushyrylymynyń 25-jyldyǵyna arnalyp úlken mereke uıymdastyrylýda. Bul týraly oblys ákiminiń baspasóz qyzmeti habarlady.

Buǵan deıin ǵaryshkerdi oblys ákimi Nurmuhambet Ábdibekov quttyqtap, oblys ortalyǵynda shara ótkizilgen. Endi Keńes Odaǵynyń Batyry, Qazaqstan Halyq batyrynyń merekesi onyń týǵan ólkesi - Qarqaralyda jalǵasýda. Odan ári olar alǵashqy qazaqstandyq ǵaryshkerdiń ata-babasyna zıratyna baryp, olardyń rýhyna quran baǵyshtady.  Artynsha aýdandyq ıppodromda at sportynan jarys ótti.

Ǵaryshkerdi avıatsııa men ǵarysh tarıhymen baılanysty tulǵalar quttyqtady: olardyń qatarynda - synaqshy ushqysh, Keńes Odaǵynyń Batyry - Georgıı Mosolov, RF eńbek sińirgen mashına jasaýshysy Valerıı Novıkov, reseılik ǵaryshker Valerıı Korzýn t.b.

Sondaı-aq, qurmetti qonaqtardyń ishinde T. Áýbákirovpen ǵaryshqa ushqan, ekıpaj músheleri - KSRO ushqysh ǵaryshkeri, Keńes Odaǵynyń batyry Aleksandr Volkov pen Avstrııanyń tuńǵysh ǵaryshkeri Frants Fıbek te bar.

Mereıtoıǵa sondaı-aq opera ánshisi, KSRO halyq ártisi, Sotsıalıstik Eńbek Eri, Qazaqstan halyq ártisi Bıbigúl Tólegenova, qazaq kompozıtory, ánshi, Qazaqstan halyq ártisi Eskendir Hasanǵalıev keldi.

Saltanatty jıyn merekelik kontsertpen, teatrlandyrylǵan qoıylymmen jalǵasty.