Qarqaralyda Qunanbaı men Abaıǵa eskertkish ornatyldy

QARAǴANDY. QazAqparat - Qaraǵandy oblysynyń Qarqaraly qalasynda Qunanbaı Óskenbaıuly men bala Abaıǵa qoıylǵan eskertkish ashyldy. Saltanatty sharaǵa qazaq halqynyń kemeńger tulǵalarynyń urpaqtary da keldi, dep habarlaıdy QazAqparat tilshisi.

Qarqaralynyń aǵa sultany Qunanbaı qajy ózi muryndyq bolyp, istiń basy-qasynda júrip meshit saldyrǵan. Halyq arasynda «Qunanbaıdyń meshiti» - búgingi kúni búkil respýblıkaǵa zor maqtanyshpen aıtýǵa da, kórsetýge de turatyn memleket qorǵaýyndaǵy tarıh jáne sáýlet eskertkishi. Búgin osy meshitti saldyryp, ımandylyqty nasıhattap, mura retinde meshit salyp ketken Qunanbaı babamyzǵa urpaqtarynan músin qoıyldy.

Qarqaralyda Qunanbaı Óskenbaıuly men bala Abaıǵa qoıylǵan músin ornatý ıdeıasyn aýdan ákimi Qalel Maqsutov tastaǵan. Al eskertkishti jergilikti músinshi Sáken Dáýletbaev jasap shyqqan.

Eskertkishtiń ashylýyna Shyǵys Qazaqstan oblysynan jáne Qaraǵandy oblysynyń Abaı aýdanynan Qunanbaı qajynyń týystary men Almaty, Nur-Sultan qalalarynan arnaıy qonaqtar keldi.

Músindi ashý rásimin Qarqaraly aýdanynyń ákimi Qalel Maqsutov, Abaı aýdany máslıhatynyń hatshysy Erlan Іldebaev , Qosman Ǵımranuly jáne qala turǵyny Álıasqar Qapanuly ótkizdi. Aýdandyq, oblystyq Abaı oqýlarynyń jeńimpazdary Dúısen Abylaı men Ormash Aqerke Abaı óleńderin jatqa oqydy.

Jıynnan keıin qonaqtar Abaı toqtaǵan úıdiń aldynda ornatylǵan Qarqaralynyń tabıǵı tasyna qashalyp salynǵan Abaıdyń beınesin baryp kórdi. Týyndynyń avtory, Qarqaraly qalasynyń taǵy bir talantty uly - Kárim Manarbek.

Shara sońy mádenıet úıinde Qarqaralynyń qurmetti azamaty Rymbala Kenjebalaqyzy arnaıy jibergen «Qunanbaı» fılmin tamashalaýmen jalǵasty.