Qarqaralyda balabaqsha býhgalteri aýrý balasyn emdetý úshin 24 mln teńge jymqyrǵan

Qaraǵandy oblysynyń Qarqaraly qalasyndaǵy «Erketaı» bóbekjaı-baqshasynyń bas býhgalteri óziniń jeke shotyna 24 mln teńgeden astam qarajat aýdarǵan. Oǵan 6 jylǵa bas bostandyǵynan aıyrý jazasy taǵaıyndaldy, dep habarlaıdy QazAqparat tilshisi.

Bıýdjet qarajatyn urlaý faktisin ekonomıkalyq tergeý departamentiniń mamandary anyqtady.

Tergeý barysynda «Erketaı» bóbekjaıy bas býhgalteri 2021 jyldan 2022 jylǵa deıin eki jyl boıy bıýdjet qarajatyn urlaǵany áshkere boldy.

Balabaqshanyń bas esepshisi óziniń kartochka shotyna negizsiz joǵary jalaqy men demalys tólemderin aýdaryp otyrǵan.

Osylaısha eki jyl ishinde jeke shotyna 24 196 411 teńge aýdarǵan.

«Jaýap alý barysynda D. A. Rýstemova bul qylmysqa aýtızmniń aýyr túrimen aýyratyn kámeletke tolmaǵan qyzynyń aýrýyna baılanysty barǵanyn, balasy týǵannan 1-toptaǵy múgedek ekenin, urlanǵan bıýdjet qarajatyn qyzyn emdeýge, uzaq merzimdi emdeýge baılanysty jınaqtalǵan qaryzyn óteýge jumsaǵanyn túsindirdi. Atalmysh qylmys Qylmystyq kodeksinde aýyr qylmys sanatyna jatatyn jáne múlki tárkilenip, 7 jyldan 12 jylǵa deıin bas bostandyǵynan aıyrý jazasyn kózdeıtin 189-baby 4-bóligi 2-tarmaǵy boıynsha saralanady», - dep habarlady Qaraǵandy oblysy boıynsha ekonomıkalyq tergeý departamentiniń baspasóz qyzmeti.

Atalmysh is boıynsha sotqa deıingi tergeý 15 kún ishinde aıaqtalyp, sotqa jiberildi. Bir aıdan keıin bas býhgalterge úkim shyqty.

«Qaraǵandy oblysy Qarqaraly aýdandyq sotynyń úkimimen D.A. Rústemova kináli dep tanylyp, QR QK 74 - babynyń 1-bóliginiń tártibimen 6 jylǵa sottaldy. Ol jazasyn 5 jyldan keıin ortasha qaýipsiz kolonııada óteıdi», - dep tolyqtyrdy ekonomıkalyq tergeý departamenti.