Qarqaralyda Ahmet Baıtursynulyna eskertkish ornatyldy

QARQARALY. QazAqparat – Qarqaralyda ult ustazy, Alashordanyń belsendi ókili Ahmet Baıtursynulyna eskertkish ornatyldy, dep habarlaıdy QazAqparat tilshisi.

Eskertkish Qarqaraly mańyndaǵy Qorǵantas taýynyń eteginen qazylǵan tutas tastan jasalǵan. Onyń avtory – Qarqaraly aýdany memlekettik muraǵatynyń basshysy Manarbek Kárim. Bul músinshiniń ult ustazyna arnalǵan ekinshi jumysy.

Buǵan deıin «Alash» partııasy kóshbasshysynyń 150 jyldyǵyna arnalǵan eskertkish Qaraǵandydaǵy Ahmet Baıtursynuly atyndaǵy mektep-gımnazııasynyń aýlasynda ornatylǵan bolatyn.

«Qorǵantas taýy Qarqaraly qalasynyń batys bóliginde ornalasqan. Men buǵan deıin dál osyndaı eskertkish jasap, osy taýdyń eteginen alynǵan qatty tasty qoldandym. Mine, osy joly da sol tasty qoldandym. Eskertkishtiń eni – 2,2 metr, bıiktigi – 4,3 metr. Onyń salmaǵy shamamen 5 tonna. Mundaı tapsyrystardy oryndaý men úshin úlken mártebe», – deıdi músinshi.

Qarqaraly aýdandyq bilim bólimi ǵımaratynyń janyna qoıylǵan eskertkishtiń ashylýyna qoǵam belsendileri, pedagogter men qala ákimi Erlan Qusaıyn qatysty.