Qarqaralydaǵy órtten zardap shekkenderdiń jaǵdaıy turaqty – basqarma

<p>QARAǴANDY. KAZINFORM &ndash; Qaraǵandy oblysynyń Densaýlyq saqtaý basqarmasy dala órtin sóndirý kezinde kúıik shalǵan 4 órt sóndirýshiniń jaǵdaıyna qatysty málimdeme jasady, dep habarlaıdy Kazinform agenttiginiń tilshisi.&nbsp;</p>

«Qarqaraly aýdanynyń Shóptikól aýylynyń mańynda dala órtiniń saldarynan tórt adam zardap shekti. Tórteýi de Qarqaraly aýdandyq ortalyq aýrýhanasyna jatqyzyldy. Sodan keıin olar bizge H. Maqajanov atyndaǵy klınıkaǵa jetkizildi. Barlyq zardap shekkenderge qajetti kómek kórsetilýde. Qazirgi ýaqytta naýqastardyń jaǵdaıy turaqty», - dedi H. J. Maqajanov atyndaǵy kópsalaly aýrýhananyń travmatologııalyq ortalyǵynyń basshysy Berik Tóleýbaev.

Esterińizge sala keteıik, 6 qazanda Qarqaraly aýdanynda dala órti bastaldy. Órtti sóndirý kezinde 24-ÓSB azamattyq qorǵaý serjanty Halı Haırat qaza tapty. 

Dala órtin sóndirý úshin TJM barlyq qyzmeti, onyń ishinde TJD 111 qyzmetkeri, quqyq qorǵaý organdary, 27 túrli tehnıka jumyldyryldy, órt sóndirýdiń jedel shtaby ashyldy. Oblys ákimi oqıǵa ornynda jedel shtabpen keńes ótkizdi.