Qarqaraly, Ulytaý, Zaısan jáne Katonqaraǵaıda áýejaı salynbaq

<p>Elimizde 3 jańa júk avıatasymaldaýshy qurylady. Bul týraly Úkimet otyrysynda Kólik mınıstri Marat Qarabaev aıtty, dep habarlaıdy Kazinform.&nbsp;</p>

«Ushý turaqtylyǵyn jáne avıatasymaldardyń qoljetimdiligin arttyrý úshin otandyq kompanııalardyń ushaqtar parki tolyqtyrylyp jatyr. Osy jyly qazaqstandyq avıakompanııalar 10 áýe kemesin satyp aldy. Nátıjesinde olardaǵy oryndyqtardyń sany 26 paıyzǵa ósip, 15 myń 200 boldy. Jalpy, 2025 jyldyń sońyna deıin qazirgi qol qoıylǵan sharttarǵa sáıkes áýe parki 25 birlikpen tolyqtyrylyp, 124 ushaqty quraıtyn bolady. Ondaǵy oryndar sany 32 paıyzǵa artady. Borttar sanynyń artýy avıabıletter qunynyń jáne avıareısterdiń keshigý deńgeıiniń tómendeýine yqpal etetin bolady. Oǵan qosa, júk tasymaly segmentin damytý maqsatynda 3 jańa júk avıatasymaldaýshy qurylý satysynda», - dedi Marat Qarabaev.

Mınıstrdiń aıtýynsha, shaǵyn avıatsııany damytý úshin bıýdjet qarajaty esebinen Balqash, Úsharal jáne Úrjar áýejaılaryndaǵy ushý-qoný jolaqtary jańǵyrtyldy jáne Úsharalda jańa aerovokzal salyndy.

Sonymen qatar, az qýatty áýejaılar jáne atalǵan áýejaılarǵa ushatyn reıster memleket tarapynan sýbsıdııalanyp jatyr.

«Aldaǵy 2-3 jylǵa arnalǵan josparda Balqash jáne Úrjar áýejaılaryn jańǵyrtýdy júzege asyrý, Qarqaraly, Ulytaý, Zaısan jáne Katonqaraǵaı áýejaılaryn salý máselesi pysyqtalyp jatyr», - dedi ol.