Qaryzy bastan asqan adamdardy qarjylyq saýattylyqqa úıretetin saıt ashyldy
Bul resýrs «Qaryzsyz qoǵam» jobasynyń aıasynda, eldegi ekinshi deńgeıli bankterdiń demeýshiligimen ázirlengen. Maqsaty – qaryzy kóbeıip, qaıtara almaı júrgen adamdarǵa qarjylyq saýattylyq álippesin úıretip, qajet degenderge zańgerdiń kómegin tegin usyný.
Joba jetekshisi Aqmaral Bekmurzaeva byltyr baǵdarlamaǵa qatysqan 65 myń adamnyń ortasha jasy 36 jas bolǵanyn, búkil kontıngenttiń 75 paıyzy áıelder bolǵanyn, 10 paıyzy zeınetkerler ekenin aıtady.
«Óńirler arasynda Túrkistan oblysynyń turǵyndary belsendi qatysty. Osy 65 myń adamnyń 10 paıyzy bir jyldyń ishinde nesıesin japty. Biraq bul – shaǵyn somadaǵy nesıeler. 5-6 mln teńgeden qaryzy bar adamdar, ókinishke qaraı, áli tólep júr. Bul jerde olarǵa tózimdilik kerek. Ondaı adamdardyń kóbi bizdiń zańgerlerdiń tegin kómeginiń, quqyqtyq súıemeldeýiniń arqasynda boryshyn qaıta qarjylandyrdy. 65 myń adamnyń 15 myńy osy múmkindikti paıdalandy. Olardyń aı saıyn tóleıtin somasy azaıtylǵanmen, jyly uzardy», - dedi ol.
Aıtýynsha, bıyl jobaǵa 750 myń adamdy tartý kózdelgen. Onyń ishinde 200 myń eresek adam, 100 myń stýdent, 450 myń oqýshy bar.
«Bıyl qarjylyq saýattylyq dápterin shyǵardyq. Jobaǵa qatysýshylarǵa bul dápterler tegin beriledi. Bul dápterdi jalpaq tilmen» shpargalka» dep ataýǵa bolady. 5 kún ishinde baǵdarlamany tolyq meńgere almaǵandar, meńgergenin umytyp qalǵan adamdar osy dápter kómegimen berilgen bilimdi qaıta pysyqtaı alady. Bıyl biz baǵdarlamanyń qamtý aıasyn qaıta qaradyq. Bıyl ol eldegi 17 óńirden bólek úshi iri qala – Astana, Almaty men Shymkentte de iske asyrylady. Biz baǵdarlamany bloktar boıynsha kúsheıttik. Atap aıtsaq, ınvestıtsııalar blogyn qostyq. Qatysýshylardyń oǵan degen qyzyǵýshylyǵy joǵary. Bıyl biz onlaın platforma jasap shyǵardyq. Búginde osy onlaın platforma arqyly baǵdarlamaǵa qatysýǵa ótinim qabyldanyp jatyr. Qogamfin.kz saıtyna kirý arqyly aýyl, aýdan, qala turǵyndary ótinim jiberip, baǵdarlamaǵa qatysýshy retinde tirkele alady. Saıtta oqý kestesi turady. Sonyń ishinen ózińizge yńǵaıly ýaqytty tańdap kórsete alasyz. Ýaqytty tańdap jazylǵannan keıin joba menedjeri qońyraý shalady. Osylaı baılanys ornaıdy», - dedi Aqmaral Bekmurzaeva.
Bıyl da joba aıasynda qaryzyn qaıtara almaı júrgenderge baǵdarlama zańgerleri tegin kómek kórsetpek. Platformany ázirleýshi Álisher Ómirbaevtyń sózine qaraǵanda, bul saıttan aptanyń jeti kúninde 24 saǵat boıy qajetti aqparat alýǵa bolady. Tek aqparat alyp qana qoımaı, qarjylyq saýattylyq mashyqtaryn qashyqtan alýǵa múmkindik bar. Tipti bul sabaqtarǵa qatysa almaǵandardyń kýrs materıaldaryn beınesabaqtar men ádistemelik materıaldardan alýyna jaǵdaı jasalmaq.