Káriz tazalaýǵa arnalǵan jańa qondyrǵy Atyraý ekologııasyn jaqsartady
Atyraý qalasynyń sol jaǵalaýyna arnalǵan káriz tazartý qondyrǵylary kesheniniń qurylysy 2017 jyly bastalǵan. Qazirgi ýaqytta negizgi qurylys-montajdaý jumystary aıaqtalyp keledi. Kelesi jyly atalmysh keshen óz qyzmetin tolyqqandy bastaýy tıis.
Óńir basshysy atalmysh jobanyń ereksheligine toqtala kelip, aımaqtyń ekologııalyq qaýipsizdigi úshin mańyzdy ekenin atap ótti.
Keshen quramynda negizgi káriz aıdaý stansasy, tazalanbaǵan aǵyn sý qondyrǵysy, káriz tazartý qondyrǵylarynyń alańy, tazalanǵan aǵyndardyń kollektory, bıologııalyq kólder men býlaný alańdary bar. Tazartýdyń bundaı tásili Qazaqstannyń tek birneshe qalasynda ǵana paıdalanylady. Jańa keshen paıdalanýǵa tapsyrylǵan soń «Sasyqsaıdaǵy» býlaný alańdary joıylady.
Jańa keshendi paıdalanýǵa tapsyrǵan soń ǵana múmkin bolatyn aǵyndy sýdy tazalaýdyń jańa túri eń aldymen ekologııa úshin asa mańyzdy. Tazalanǵan sý kózderi, jer qabattary men jerasty sýynyń lastanýyna jol bermeıdi. Taǵy bir eskerer jaıt, las sý aınaladaǵy ekologııalyq júıege keri áserin molynan tıgizedi.
Jańa tazalaý qondyrǵylary jumys barysynyń tıimdiligin arttyrady. Óıtkeni, tazalanǵan aǵyn sýdy sharýashylyq maqsatta qaıtadan paıdalanýǵa bolady.
«Atyraý Sý Arnasy» KMK ókiline oblys ákimi tosyn usynys jasady.
«Osy nysandy keıin sizdiń mekeme óz quzyryna alady. Mamandaryńyz qazirden-aq atalmysh keshende jumys jasaı alýy úshin qondyrǵynyń qyr-syrymen tanysa berýi kerek. Olar nysan paıdalanýǵa tapsyrylǵansha qyzmetti bastap ketetin dárejede bolýy kerek. Maýsymmen qyzmet jasaýy úshin munda kem degende 20 shaqty mamandy jiberýińiz kerek, - dedi Nurlan Noǵaev. – Jumystar josparǵa saı júrgizilip keledi, nysandy mejeli ýaqytynda tapsyrýymyz kerek».
Bıylǵy naýryzda oblys ákimi nysanǵa kelgen bolatyn. Sol kezde atap ótkendeı, atalmysh jobany júzege asyrý qala mańyndaǵy kóptegen problemany sheshedi, ásirese, ekologııalyq ahýaldy jaqsartady. Keıin káriz tazartý kesheniniń júıesine jeke sektordaǵy úılerdi qosý da josparlanyp otyr.
Aıta keteıik, qazirgi qoldanyp júrgen káriz tazartý júıesi sonaý 1978 jyly salynǵan. Sol ýaqyttan beri bul júıege jóndeý jumystary júrgizilmegen. Aǵyn sý býlaný alańdaryna jiberiler aldynda tıisti tazartýdan ótkizilmegen. Jańa júıe iske qosylǵan sátten bastap káriz júıeleriniń ekologııaǵa teris yqpaly múldem toqtaıdy.