Káriz qubyrlary 90 paıyzǵa tozǵan qalalar ataldy

ASTANA. QazAqparat – Kókshetaý, Ekibastuz, Semeı jáne Rıdder qalalaryndaǵy káriz qubyrynyń 90%-y tozǵany belgili boldy. Osy oraıda senator Olga Býlavkına Úkimetti ekologııalyq qaýipsizdik máselesin sheshýge shaqyrdy, dep habarlaıdy QazAqparat tilshisi.

Senator Úkimet basshysy Álıhan Smaıylovtyń atyna joldaǵan depýtattyq saýalynda aǵyndy sýdy tazartýǵa arnalǵan qurylystardyń jaı-kúıi týraly másele kóterdi.

«Elimizdegi kárizderdi tazartý qondyrǵylary ótken ǵasyrdyń 50-shi jyldarynda salynyp, paıdalanýǵa berilgen bolatyn. Olar sodan beri jańartylǵan joq. Shyǵys Qazaqstan oblysynyń Kúrshim aýylyndaǵy tazartý qurylysynyń jumys istemegenine 10 jyldan asyp ketti. Qazirgi kezde tazartý qurylysynyń ornynda qırandysy ǵana qaldy. Aýdan ortalyǵynyń shaıyndy sýy tikeleı Kúrshim ózenine, odan ári erekshe memlekettik mańyzy bar transshekaralyq Ertis ózenine quıylady», - dedi Olga Býlavkına.

Senator mundaı jaǵdaı elimizdiń shyǵysynda ǵana emes, búkil Qazaqstan boıynsha qalyptasyp otyrǵanyn atap ótti. Mysaly, Tarazda káriz tazartý qondyrǵysy múldem salynbaǵan. Sóıtip, qorshaǵan orta zııandy shyǵaryndymen lastanyp jatyr. Bul másele Senat qabyrǵasynda buryn da kóterilgen bolatyn.

«Tazartý qondyrǵylaryn salý, jańǵyrtý jáne rekonstrýktsııalaý máselelerin sheshý máselesine toqtalsaq, káriz tazartý nysandaryn jobalaý kezinde sarqyndy sýdy tazartýǵa arnalǵan joǵary tehnologııalyq zamanaýı jabdyqty paıdalanýdy eskere otyryp, biryńǵaı júıeli tásildi ázirleýdiń mańyzy zor», - dedi depýtat.