Karına Ibragımova bokstan álem chempıonatynyń kúmis júldegeri atandy

ASTANA. QazAqparat – Úndistannyń Nıý-Delı qalasynda bokstan áıelder arasynda ótip jatqan álem chempıonatynda qazaqstandyq Karına Ibragımova kúmis júldegeri atandy, dep habarlaıdy QazAqparat tilshisi.

Qazaqstandyq boksshy 57 kelige deıingi salmaqta fınalda ıtalııalyq Irma Testamen sheberlik baıqasty.

Azııa chempıony, eki márte álem birinshiliginiń qola júldegeri K. Ibragımovanyń qarsylasy da myqty edi. Irma Testa – 2020 jylǵy Tokıo olımpıadasynyń qola, ótken jylǵy álem birinshiliginiń kúmis júldegeri, 2019 jylǵy Eýropa chempıony. Ekeýiniń de jasy 26-da.

Birinshi raýndta bes tóreshi túgeldeı I. Testa basym dep tapty. Aqyry qazylar jeńisti ıtalııalyq boksshyǵa berdi – 5:0.

Osylaısha, Karına Ibragımova óz sporttyq jolynda alǵash ret álem birinshiliginiń kúmis medalin jeńip aldy.

Taǵy bir qazaqstandyq Lázzat Kúngeıbaeva asa aýyr salmaqta erteń fınaldyq kezdesýin marokkolyq Mardı Hadıdjamen ótkizedi.

Eske sala keteıik, budan buryn Karına Ibragımovanyń eki dúrkin álem chempıonyn utyp, fınalǵa shyqqanyn jazǵan bolatynbyz.

Sondaı-aq, bokstan álem chempıonatynda qazaqstandyqtardyń altyn úshin kimder talasatyny, Karına Ibragımovanyń fınaldyq jekpe-jegin ótkizetini habarlandy.