Qarın Májilis maquldaǵan zań jobasy týraly: Ólim jazasyn joıýdy Prezıdent tapsyrǵan bolatyn

NUR-SULTAN. QazAqparat - Búgin Parlament Májilisiniń plenarlyq otyrysynyń ekinshi oqylymynda depýtattar «Qazaqstan Respýblıkasy Qylmystyq kodeksine ólim jazasy máseleleri boıynsha ózgerister men tolyqtyrýlar engizý týraly» zań jobasyn maquldady.

Bul týraly QazAqparat Qazaqstan Respýblıkasy Prezıdentiniń kómekshisi Erlan Qarınniń Telegram áleýmettik jelisindegi jazbasyna silteme jasap habarlaıdy.

«Atap óteıik, buǵan deıin 16 qarasha kúni Ulttyq qoǵamdyq senim keńesiniń altynshy otyrysynda Memleket basshysy Qazaqstandaǵy ólim jazasy eshqandaı eskertýsiz joıylýy qajet ekenin atap ótip, sol arqyly quqyq qorǵaýshylardyń ustanymyna qoldaý bildirgen.

Májilis osyny esepke ala otyryp, qylmystyq zańnamadan ólim jazasyn alyp tastaýdy qarastyratyn túzetýler daıyndady»,-dep jazdy Erlan Qarın.

Budan basqa, depýtattar Májilis otyrysynyń birinshi oqylymynda «Qazaqstan Respýblıkasyndaǵy bıologııalyq qaýipsizdik týraly» zań jobasyn qarastyryp, maquldady. Atalǵan zań jobasyn Densaýlyq saqtaý mınıstrligi múddeli memlekettik organdarmen birlesip Memleket basshysynyń Ulttyq qoǵamdyq senim keńesiniń úshinshi otyrysynda bergen tapsyrmalaryn oryndaý maqsatynda daıarlady.