Kárim Másimov jazasyn qaýipsizdigi ortasha mekemede óteıdi

ASTANA. QazAqparat – Ulttyq qaýipsizdik komıtetiniń burynǵy basshysy Kárim Másimovtiń jazasyn óteý mekemesi joǵary qaýiptilikten ortashaǵa aýystyryldy, dep habarlaıdy QazAqparat tilshisi elorda sotyna silteme jasap.

2023 jylǵy 16 maýsymda Astana qalasy sotynyń qylmystyq ister jónindegi apellıatsııalyq satysy K. Másimov, A. Sadyqulov, D. Erǵojın, M. Osıpov jáne olardyń qorǵaýshylarynyń shaǵymdary boıynsha «óte qupııa» degen belgimen qylmystyq isti qaıta qarady.

Astana qalasynyń qylmystyq ister jónindegi mamandandyrylǵan aýdanaralyq sotynyń 2023 jylǵy 24 sáýirdegi úkimimen K. Másimov pen A.Sadyqulov Qylmystyq kodekstiń 175-babynyń 1-bóligi, 179-babynyń 3-bóligi, 362-babynyń 4-bóligi 3-tarmaǵy boıynsha kináli dep tanylyp, 18 jáne 16 jylǵa bas bostandyǵynan aıyryldy.

Erǵojın D. Qylmystyq kodekstiń 179-babynyń 3-bóligi, 362-babynyń 4-bóligi 3-tarmaǵy boıynsha kináli dep tanylyp, 15 jylǵa bas bostandyǵynan aıyryldy.

Osıpov M. Qylmystyq kodekstiń 362-babynyń 3-bóligi boıynsha 3 jyl merzimge bas bostandyǵynan aıyryldy.

Apellıatsııalyq saty K.Másimovke, A. Sadyqulovqa jáne D. Erǵojınge qatysty sottyń birinshi satydaǵy «jazasyn qaýipsizdigi eń joǵary mekemede óteý» úkimin «ortasha qaýipsizdiktegi mekemede jazasyn óteý» úkimine ózgertti.

Qylmystyq kodekstiń 6-babyna sáıkes, sottalǵandardyń jaǵdaıyn jaqsartatyn zań keri kúshke ıe jáne sottardyń qoldanýy úshin mindetti.

2023 jylǵy 21 mamyrda kúshine engen Qylmystyq kodekstiń 46-babyna zań shyǵarýshy engizgen ózgeristerge sáıkes buryn bas bostandyǵynan aıyrýdy ótemegen, qasaqana qylmys jasaǵany úshin 2 jyldan astam merzimge bas bostandyǵynan aıyrylǵan adamdarǵa bas bostandyǵynan aıyrý túrindegi jazany óteý ortasha qaýipsizdik qylmystyq-atqarý júıesiniń mekemelerinde taǵaıyndalady (bas bostandyǵynan aıyrýǵa qaramastan).

Qalǵan bóliginde úkim ózgerissiz qalady. Úkim zańdy kúshine endi.