Kárim Másimov: Otanǵa minsiz qyzmet etý – boryshymyz

NUR-SULTAN. QazAqparat - 13 shilde - Ulttyq qaýipsizdik organdary kúnine oraı Egemen Qazaqstan gazetinde ulttyq qaýipsizdik general-leıtenanty, Ulttyq qaýipsizdik komıtetiniń tóraǵasy Kárim Másimovtyń kólemdi maqalasy jarııalandy. QazAqparat maqalanyń tolyq nusqasyn oqyrman nazaryna usynady.

Elimiz Táýelsizdigimizdiń 30 jyldyǵyn atap ótetin jyly 13 shildedegi Ulttyq qaýipsizdik organdarynyń kúni boryshqa adaldyq pen Otanǵa minsiz qyzmet etýdiń sımvolyna aınalyp, erekshe mánge ıe bolyp otyr.

Biz Qazaqstannyń qalyptasýy men gúldenýine atsalysqanymyzdy maqtan tutamyz. Táýelsiz damýdyń úsh onjyldyǵy ishinde Tuńǵysh Prezı­dentimiz – Elbasy Nursultan Nazar­baevtyń kóshbasshylyǵymen kóp­ultty Qazaqstan halqy ekonomıkalyq qýatty, demokratııalyq jáne álemde bedeldi memleket qura aldy. Sol kezde «Ulttyq qaýipsizdik joq jerde memleket te joq» degen ámbebap formýla ázirlendi. Tarıhı faktiler men sol kúnderdiń shyndyǵy talap etken bul qatań konstrýktsııa búgingi kúni de ózekti bolyp qalyp otyr.

Álemdik saıasat pen ekonomıkadaǵy jahandyq kún tártibi kóz aldymyzda ózgerýde. Koronavırýs pandemııasy – COVID-19 jáne onyń saldary búginde búkil álemdik qoǵamdastyqtyń aldynda turǵan jańa qıyndyqtar men qaýipterdiń alýan túrliligin kórsetedi. Geosaıası kórinis barlyq saladaǵy – saıasattaǵy, ekonomıkadaǵy, áleýmettik ómirdegi, tehnologııalardaǵy transformatsııamen tereń úılesedi. Sońǵy eki jylda álemdegi qoǵamdyq problemalar men ekonomıkalyq teńgerimsizdikter shıelenise tústi. Týrbýlentti kezeńde turǵan halyqaralyq qatynastardyń sıpaty da ózgerdi. Turaqsyzdyq pen boljamsyzdyq artty. Jahandyq qaýipsizdik júıesi quldyraýda. Halyq­aralyq ınstıtýttardyń álsireýi baı­qalady. Aımaqtyq qaqtyǵystar kóbeıip barady. Saıası jáne aqparattyq qysym, jappaı sana men aýmaqtyq talaptardyń manıpýlıatsııasy keńeıýde, ultaralyq jáne basqa da aımaqtyq problemalar ózekti bolyp, mádenı-adamgershilik jáne demografııalyq damý protsesteri ózgerýde. Ekologııalyq kún tártibinde klımattyń ózgerý problemalary aldyńǵy orynǵa shyǵyp keledi. Qazirgi jaǵdaıda jetekshi oıynshylardyń «klımattyq soǵysta» jańa qarsy turýlary joqqa shyǵarylmaıdy.

Bul bizdiń eldegi jaǵdaıǵa teris áser etetin shyndyq ekenin túsi­nemiz. Memleketterdiń bir-birine eko­no­mıkalyq sanktsııalar qoldanýy halyqaralyq saýdany tejeıdi. Sonyń saldarynan qazaqstandyq eksportty jáne tranzıttik áleýetti damytý keleshegi shekteledi.

Ekologııalyq kún tártibi «jasyl ekonomıkanyń» damýyn ózektendiredi, bul álemdik oń trend bolyp tabylady.

Terrorıstik áleýettiń basqa elderden oryn aýystyrýyna baılanys­ty terrorızm men ekstremızmniń damý qaýpi kún tártibinen alynbaı­dy. Birinshiden, biz amerıkalyq ásker­lerdi Aýǵanstannan shyǵarý týraly aıtyp otyrmyz, onda aımaqtyq qaýipsizdik sala­syndaǵy shıelenister artyp keledi. Jaǵdaıdyń osyndaı jolmen odan ári damýy turaqsyzdyq vektorynyń aýysýyna, dinı-eks­tremıstik uıymdardyń jekelegen top­tarynyń óńirge umtylysyna, bos­qyndardyń baqylanbaıtyn aǵym­da­ryna, halyqaralyq esirtki trafıginiń ósýine jáne t. b. ákelip soǵýy múmkin.

Álemdik jáne ishki qaterler men qyr kórsetýlerge qaramastan, Ulttyq qaýipsizdik komıteti óziniń kúsh-jigerin Qazaqstannyń ulttyq múddelerin, kons­tıtýtsııalyq qurylysyn, qoǵamdyq qaýip­sizdigi men ekonomıkalyq áleýetin qorǵaýǵa jumyldyrdy. Munda da basym mindetterdiń biri terrorızm men ekstremızmge qarsy is-qımyl bolyp tabylady. Osy baǵytta qabyldanǵan shara­larmen biz turaqtylyqty saqtap, eldegi terrorıstik jáne ózge de zorlyq-zombylyq kórinisterine jol bermeı otyrmyz.

Sońǵy ýaqytta qazaqstandyq azamat­tardyń halyqaralyq terrorıstik uıym­dar quramyna qatysýy qysqartyldy. Bul protseske «Jýsan» operatsııasynyń kezekti, dálirek aıtqanda, besinshi keze­ńin iske asyrý oń áserin tıgizdi, nátıjesinde 600-den astam qazaqstandyq Sırııadan Otanyna oraldy. Olardy radıkaldy kózqarastan aryltý, ońaltý jáne beıimdeý jumystary qarqyndy júrgizilýde. Quqyqtyq turǵydan olardy oqshaýlaý jáne terrorıstik is-áreketke qatysqany úshin sottaý boıynsha da sharalar qabyldanýda.

Búginde eldiń Terrorızmge qarsy ortalyǵy turǵysynan terrorızmge qarsy is-qımyldyń jalpy memlekettik júıesi men memlekettik jáne jergilikti atqarýshy organdardyń qyzmetin úılestirý jolǵa qoıyldy, osy jumystyń quqyqtyq, uıymdastyrýshylyq jáne materıaldyq-tehnıkalyq qamtamasyz etilýi jetildirilýde. Ortalyq elimizdegi terrorızmge qarsy tıimdi is-qımyl úshin jaǵdaı jasap, ony odan ári damytady. Ol qabyldaǵan sheshimder terrorızmge qarsy is-qımyl ýchaskelerinde memlekettik jáne jergilikti atqarýshy organdardyń qyzmetin jetildirýge baǵyttalǵan. Sonyń ishinde aldyn alý sharalaryn jetildirýge basa nazar aýdaryldy. Oǵan úkimettik emes uıymdar men túrli sarapshylar belsendi tartylýda. Tek bıylǵy jyly 500 myńnan astam adamdy qamtıtyn 5 myńnan astam is-shara ótkizildi. Internet-resýrstardan 53 myńnan astam terrorıstik jáne ekstremıstik materıal­dar alynyp, buǵattaldy. Al aldyn alý is-shara­lary­nyń qorytyndysy bo­ıynsha eks­tremıstik ıdeologııanyń 888 ustaný­shysy dástúrli ıslam normalaryna kóshti, radıkaldy-dinı ıdeologııanyń 1067 jaqtaýshysy qazaqstandyq qoǵam­nyń qundylyqtaryna beıimdeldi.

Aldyn alý sharalarynyń qory­tyndysy boıynsha terrorızm aktisi týraly jalǵan habarlamalar sany azaıdy. Qazirgi ýaqytta terrorızmge qarsy operatsııalardy júrgizý kezinde mınıstrlikter men vedomstvolardyń kúshteri men quraldaryn tıimdi bas­qarýǵa qol jetkizildi. Terrorıstik, ekstremıstik jáne ózge de qylmystyq uıym­dar músheleriniń Qazaqstanǵa kelýiniń yqtımal joldarynyń biri bolyp tabylatyn zańsyz kóshi-qon arnasynda 20 qylmystyq is qozǵalyp, 18 adam sottaldy.

Qarsy barlaý jumysy árqashan erek­she nazar aýdarýǵa turarlyq, biraq belgili sebeptermen biz bul salada keń ashyqtyqqa jol bermeımiz. Eldiń saıa­sı turaqtylyǵyna, ekonomıkalyq ál-aýqatyna jáne qorǵanys áleýetine nuqsan keltirýge baǵyttalǵan barlaý is-sharalary der kezinde toqtatylyp jatqanyn senimmen aıtamyn.

Sonymen qatar UQK qazirgi qoǵamnyń qajettilikterine jyldam den qoıady jáne kóshi-qon rásimderin yryqtandyrý, elimizdegi týrıstik jáne ınvestıtsııalyq ahýaldy jaqsartý jónindegi memlekettik saıasatqa járdemdesedi. Aıtalyq, Komıtet basqa da múddeli memlekettik organdarmen birlesip, 2020 jyly sheteldikterdi tirkeýdiń jáne olardyń kóshi-qon kartochkalaryn toltyrýy qajettiliginiń kúshin joıýdy qoldady. 57 elmen 30 kúndik, al Qytaı men Úndis­tannan kelgen tranzıtshiler úshin 72 saǵattyq vızasyz rejimdi engizý kelisildi. Týrısterge memlekettik mekemelerge barmaı-aq, kóshi-qon qyzmetinde tirkelýge múmkindik beretin «E-Qonaq» zamanaýı elektrondy júıesin engi­zýge bastamashylyq jasaldy. Bul jańa­shyldyq Qazaqstannyń týrıstik ımıd­jin arttyrý úshin qolaıly jaǵdaı týǵy­zady.

Memlekettik qupııalardy qorǵaý jó­nindegi ýákiletti organ fýnktsııa­syn qabyldaı otyryp, biz ulttyq múd­delerdi qozǵaıtyn málimetterdi qupııa­landyrýǵa qatysty ákimshilik sharalar men tásilderdiń eskirgen júıesin qaıta qaradyq. Qazirgi qaýip-qaterlerge negizdelgen naqty qupııalardyń tizbesi jańartyldy. Memlekettik qupııalardy qorǵaý salasyndaǵy 36 normatıvtik quqyqtyq aktilerdiń jobasy kelisildi.

Qazirgi jaǵdaıda kıberqaýipsizdik, tsıfrlyq keńistik buryn-sońdy bolmaǵan qatań qarsy turýdyń jańa órisine aınalýda. Sondyqtan kıberqylmyskerlerdi, olardyń umtylystary men nıetterin kúnilgeri eseptep bilý, ulttyq qaýipsizdik múddelerine, azamattarymyzdyń qaýip­sizdigine nuqsan keltirmeý – bizdiń maman­dardyń birinshi kezektegi mindetteri. Olar derekterdiń úlken kólemine, sonyń ishinde tájirıbe almasý jáne úzdik sheteldik arnaýly qyzmetterdiń jetistikterin qoldaný arqyly taldaý, forsaıt-zertteýler júrgizedi.

Árıne, kıberqaýipsizdikti qamtama­syz etý úshin áli kóp nárse isteý kerek, sebebi ómirdiń barlyq salasyn ja­­han­­dyq aqparattandyrý quqyqqa qar­sy áreket úshin jańa ortanyń paıda bolýyna ákeledi. Buǵan aqparattyq-kom­mýnıkatsııalyq ınfraqurylymnyń asa mańyzdy obektilerine qatysty quqyq buzýshylyq faktileri boıynsha alǵash ret júrgizilgen jáne iske asyrylǵan qylmystyq ister kýá bola alady. Atap aıtsaq, 2020 jyldyń mamyr aıynan bas­tap «E-Lıtsenzııalaý» MDQ» aqparattyq júıesin zańsyz túrlendirý faktileri bo­ıynsha (QR QK 206-baby 1-tarmaǵynyń 2-bóligi boıynsha) QR azamattarynyń kinásin moıyndaý týraly sheshim kúshine endi, onda uıym qyzmetkerleri jeke paıda tabý maqsatynda qyzmet babyn paıdalana otyryp, zańdy tulǵalar úshin ruqsat qujattaryn zańsyz resimdeýdi júzege asyrǵan.

UQK mamandarynyń bıylǵy jyly ǵana QR zańnamasyn buzý faktileri boıynsha TsDIAÓM (aqparattyq qaýipsizdikti qamtamasyz etý jáne derbes derekterdi qorǵaý salasyndaǵy ýákiletti organ) aldyn alý-eskertý is-sharalaryna tikeleı qatysýy barysynda 30 laýazymdy jáne birqatar zańdy tulǵa ákimshilik jaýapkershilikke tartyldy. Sonymen qatar UQK «MTQ» AQ tehnıkalyq múmkindikteri arqyly nysanaly aýdıtorııasy jeliniń qazaqstandyq segmentin paıdalanýshylar bolyp tabylatyn fıshıngtik resýrstar jolymen Internet jelisindegi alaıaqtyqtyń ulǵaıýy tirkelip otyr (2020 jyly «Fıshıng» túrindegi oqıǵalar sany 2019 jylmen salystyrǵanda 58%-ǵa ósti). QR azamattarynyń qupııa derekterin alý maqsatynda teris pıǵyldy adamdar ınternet-bankıngterdiń, poshta uıym­darynyń, ınternet-dúkenderdiń, habarlandyrý alańdarynyń jáne basqa da onlaın-servısterdiń saıttaryn ımıtatsııa­laıdy. Budan basqa, halyq­ty májbúrli oqshaýlaý kezeńinde qashyqtan bilim berýdi, eńbek qyz­metin jáne memlekettik basqarýdy qamta­masyz etýdiń bilim berý salalary basym maq­sattar bolyp tabylady (DDoS-shabýyl­dardyń jalpy sany 2019 jylmen salys­tyrǵanda 2020 jyly 44%-ǵa artty).

Sarapshylar shabýyldaýshylardyń eldiń kıberkeńistigindegi belsendiliginiń odan ári artýyn boljap otyr, ol kı­berqaýipterge qarsy is-sharalardyń tıimdiligi men jedeldigin arttyrýdy talap etedi. Bul eldiń aqparattyq keńis­tiginiń zańsyz qolsuǵýshylyqtan qorǵalýyn arttyrýǵa baǵyttalǵan ilespe zańnamalyq, uıymdyq jáne tehnıkalyq sharalardy talap etedi.

Qazirgi daǵdarys jaǵdaılarynda eldiń ekonomıkalyq qaýipsizdigin qamtamasyz etý birinshi kezektegi mánge ıe bolyp, Qazaqstan Respýblıkasy damýynyń strategııalyq vektorlaryn ázirleý úshin negiz bolyp tabylady. Qoǵam bıznestiń toqyraýyna, ınvestıtsııalardyń qysqarýyna tap bolyp otyr, bul halyqtyń ál-aýqatynyń tómendeýine ákeledi. Osyny eskere otyryp, biz birqatar zańnamalyq aktige qajetti túzetýler engizýge basta­mashylyq jasadyq.

Qorǵanys-ónerkásip kesheninde halyqaralyq qurylymnyń qazaqstan­dyq paıdalanylmaıtyn áskerı mú­lik naryǵyn keıinnen ony áskerı qaqty­ǵystar aımaǵyna shyǵara otyryp, monopolııalandyrý áreketteri buǵat­taldy, sóıtip Qazaqstan úshin syrtqy saıası jáne ımıdjdik táýekelder joıyldy. Sondaı-aq halyqaralyq uıymnyń qazaqstandyq 30 mln oq-dárini eksporttaýǵa mámile jasaýynyń aldy alyndy. Al 2020 jyldyń qazan aıynda eksporttyq baqylaýǵa jatatyn áskerı ónimdi (500 birlik kevlar dýlyǵasy) ruqsat qujattaryn resimdemeı áketýge tyıym salyndy. Sonymen qatar qazaqstandyq áýe kemeleriniń shetelderde paıdalanylýyn baqylaý qatańdatyldy, bul olardyń jaýyngerlik qaqtyǵystar aımaǵyna táýekeldi tasymaldarǵa tartylýyn boldyrmaýǵa múmkindik berdi. SigmaAirlines, AzeeAir jáne Aircompany Jenis Air áýe kom­panııalarynyń lıtsenzııa­laryn qaıtaryp alýǵa bastamashylyq jasaldy.

Ýákiletti organdardyń aldynda ıadro­­lyq qarýsyzdaný baǵdar­lamasy sheń­berinde áskerı oq­tumsyq­tardan Reseı tarapy alǵan ýran­nyń qazaqstandyq úlesi úshin Qazaq­stannyń aqshalaı ótemaqy alý máselesi ózektilendirildi. Nátıjesi – 136,1 mlrd teńge bıýdjet túsimi. Ortalyq Azııa respýblıkalarynyń biriniń arnaýly qyzmetimen birlesip, biz transulttyq qylmystyq toptyń (OA elderiniń azamattary qatarynan) ıadrolyq materıaldardyń zańsyz aınalymy salasyndaǵy áreketiniń jolyn kestik. Jalpy, 2020 jyldyń ózinde ǵana memlekettiń ekonomıkalyq damý baǵdarlamalaryn qarsy barlaýmen súıemeldeý, sondaı-aq sheteldik ınvestorlardyń, qarjy-ónerkásip toptary men transulttyq kompanııalardyń qyzmetin baqylaý sheńberinde 925,3 mlrd teńge somasynda ekonomıkalyq zalal keltirýdiń aldy alyndy, memleket kirisine 147,23 mlrd teńge túsim qamtamasyz etildi.

Qazaqstan ulttyq qaýipsizdikke tikeleı qater tóndiretin jáne trans­ulttyq qurylymdar júzege asyratyn ulttyń densaýlyǵyna nuqsan kel­tirýge baǵyttalǵan belsendi esirtki eksportynyń obektisi bolyp otyr. Esirt­ki tasymaldaýdyń 11 halyqaralyq jáne 23 óńirlik arnalarynyń joly kesildi. 15 iri esirtki zerthanasy joıyldy, transulttyq esirtki qury­lymdarynyń 26 qatysýshysy ustaldy, zańsyz aınalymnan Aýǵanstanda óndirilgen bir tonnadan astam esirtki tárkilendi. OAÓAÚO jáne AQSh Ádilet mınıstrliginiń Esirtkige qarsy kúres jónindegi federaldyq basqarmasymen (AQSh DEA) jáne Aýǵan­stannyń jáne Ózbekstannyń quzyretti organdarymen ózara is-qımyl jasaý arqy­ly birqatar birlesken operatsııa júrgizildi.

Ulttyq qaýipsizdikti qamtamasyz etý basymdyqtarynyń biri – Qazaqstan Respýb­lıkasynyń Memlekettik shekarasyn qorǵaý jáne kúzetý bolyp qala beredi. Terrorızm, zańsyz kóshi-qon jáne esirtki aınalymy qaterleriniń ózektiligi jaǵdaıynda shekara vedomstvosynyń qyzmeti jetildirilýde. Shekara qyz­metiniń oblystyq departamentterin qurý arqyly shekarany qorǵaýdyń aýmaq­tyq prıntsıpi iske asyryldy, olar­dyń materıaldyq-tehnıkalyq bazasy nyǵaıtylýda.

Shekara qaýipsizdigi máselelerin halyqaralyq, zańnamalyq jáne norma­tıvtik-quqyqtyq retteý boıynsha ­maq­­satty jumys jalǵasýda. Bıylǵy jylǵy aqpanda Kaspıı teńizindegi qyz­metti júzege asyrýǵa baılanysty máseleler boıynsha Qazaqstan Respýb­lıkasynyń zańnamalyq aktilerine óz­geris­ter men tolyqtyrýlar engizildi, olar Kaspıı mańy memleketteriniń barlyǵynyń Kaspıı teńiziniń quqyqtyq mártebesi týraly konventsııany ratıfıkatsııalaý protsesi aıaqtalǵannan keıin birden kúshine enetin bolady. Osy jyldyń alty aıynda bizdiń shekarashylar bes myńnan astam quqyq buzýshyny ustap, 100 myńnan astam oq-dárini, eki myń elektrshokerdi, 12 myń sýyq qa­rýdy shekara arqyly alyp ótýge jol bermedi.

Shekara qyzmetinde jańǵyrtý jáne rebrendıng, reformalaý boıynsha júrgizilgen is-sharalar búgingi kúni bizge ýaqyt synyna barynsha utqyr ári tıimdi jaýap berýge, Qazaqstannyń ulttyq múd­delerin senimdi qorǵaýǵa múmkindik beredi.

Ulttyq qaýipsizdikti qamtamasyz etý salasyndaǵy strategııalyq min­det­ter qarqyndy ózgerýde. Taıaý kezeń­ge boljanyp otyrǵan negizgi syn-qaterlerge laıyqty qarsy turý úshin 2021-2025 jyldarǵa arnalǵan QR Ult­tyq qaýipsizdiginiń jańa strategııasy qabyldandy. Nursultan Nazarbaevtyń tóraǵalyǵymen ótken Qaýipsizdik Keńe­siniń otyrysynda qaralǵan jáne maqul­danǵan qujatty Memleket basshysy bekitti. Onda eldiń ulttyq múddelerin qorǵaýdyń tujyrymdamalyq turǵydan jańartylǵan tásilderi bar.

Negizgi syn-tegeýrinder retinde mynalar belgilendi: birinshiden, koro­navırýstyq ınfektsııa pandemııasy jáne bıologııalyq qaýipsizdiktiń basqa da qaterleri. Ekinshiden, ekonomıkany, eńbek qatynastaryn, áleýmettik salany, aqparattyq keńistik pen kommýnıkatsııany túbegeıli ózgertetin tehnologııalyq ózgerister. Úshinshiden, qarjy-ekonomıkalyq salaǵa áser ete­tin syrtqy naryqtaǵy daǵdarystyq qubylystar. Tórtinshiden, jahandyq jáne óńirlik deńgeıdegi shıelenistiń odan ári ýshyǵýynyń teris áseri.

Ulttyq qaýipsizdikti nyǵaıtýdyń negizgi basymdyqtary adamı kapıtal salasynda – birinshi kezekte, ulttyń zııatkerlik áleýetin saqtaý men kóbeıtýde qaýipsizdikti qamtamasyz etýdi talap etedi. Bazalyq faktorlardyń qataryna bıologııalyq qaýipsizdikti qamtamasyz etý jónindegi keshendi jumystarmen qatar, qoǵamdyq densaýlyq saqtaýdy damytý engizildi.

Ekonomıkalyq qaýipsizdik mindetteri syrtqy áserlerge tózimdi, ónimdilikti yntalandyratyn jáne tehnologııalyq kúr­delilik deńgeıin arttyratyn, turaqt­y joǵary ónimdi jumys orynda­ryn quratyn jáne halyqtyń tabysyn arttyrý úshin jaǵdaılar jasaıtyn ósý modeline kóshýge baǵyttalǵan. Eko­logııalyq qaýipsizdikke keletin bolsaq, ol ekojúıelerdi qorǵaýdy ǵana emes, sonymen birge tabıǵı resýrs­tardy basq­arýdy da qamtıdy. Munda eldiń sý qaýipsizdigi erekshe oryn alady.

Aqparattyq qaýipsizdik salasynda ulǵaıyp kele jatqan kıberqaýipterge qarsy is-qımylǵa, qazaqstandyqtardyń derbes derekterin, aqparattyq ınfra­qurylymdy, strategııalyq obektilerdi qorǵaýǵa jáne tutastaı alǵanda, ulttyq aqparattyq keńistiktiń qorǵalýyn arttyrýǵa mańyzdy oryn beriledi.

UQK alqasynda Memleket basshysy Qasym-Jomart Toqaev búginde UQK tıimdi jáne zamanaýı arnaýly qyzmet retinde qalyptasqanyna mamandar men qalyń jurtshylyq kúmán týǵyzbaıtynyn atap ótti. Bul – Komıtetti qurǵan jáne ony aıaǵyna turǵyzǵan Elbasynyń tarıhı eńbegi. Komıtettiń árbir qyzmeti, árbir qyzmetkeri uly mıssııany oryndaýda – elimizdi syrtqy jáne ishki qol- suǵýshylyqtan qorǵaýda. Qarqyndy túrde ózgerip jatqan «jańa bolmys» jaǵdaıynda Komıtet qyzmetiniń máni barǵan saıyn artyp otyr desek, asyra aıtqandyq emes.

Bul shynynda da solaı. Memleke­timizdiń táýelsizdiginiń mereıtoılyq jylyna kire otyryp, Ulttyq qaýipsizdik komıteti eń kúrdeli mindetterdi sheshýge qabiletti ekenin atap aıtqym keledi. Biz aldyn ala áreket etýge úırendik, UQK qyzmetiniń elıtalylyǵy men bedeli qalpyna keltirildi jáne kóptegen jas óz ómirlerin Otanymyzdyń qaýipsizdigin qamtamasyz etý isine arnaýda. UQK Qazaq­stan halqy men Prezıdentiniń laıyq­ty senimine ıe. Munyń ózi kóp nárseni mindetteıdi.

Ulttyq qaýipsizdik organdarynyń jeke quramy men ardagerlerin kásibı merekemen quttyqtaı otyryp, zor den­saýlyq, otbasylaryna amandyq jáne halqymyz ben elimizge minsiz qyzmet etýge umtylys tileımin!

Kárim MÁSІMOV,

Ulttyq qaýipsizdik general-leıtenanty,

Ulttyq qaýipsizdik komıtetiniń tóraǵasy