Kárim Másimov Atyraý munaı óńdeý zaýytynyń jańǵyrtylý barysyn baǵalady
- Atyraý munaı óńdeý zaýyty Qazaqstandaǵy alǵashqy munaı óńdeý kásiporny bolyp tabylady, ol 1945 jyldyń qyrkúıek aıynda paıdalanýǵa berilgen. Zaýytta 21 ataýmen munaı ónimderi shyǵarylady. Ónerkásiptik kólemde AI-80, AI-92, AI-93 markaly etılendirilmegen janarmaı óndiriledi, sonymen qosa AI-96 markaly etılsizdendirilgen janarmaı óndirisine ruqsat berilip, tehnıkalyq qorytyndy alyndy. Qospalar qosylǵan qysqy dızel otyny shyǵarylady.
MÓZ jańǵyrtý aıasynda 2015 jyly hosh ıisti kómirsýtekterdi óndirý kesheni paıdalanýǵa berildi. Qazirgi kezde munaıdy tereń óńdeıtin jańa kesheniniń barlyq nysandarynda qurylys jumystary júrgizilýde. Jobanyń mehnıkalyq kezeńi bıylǵy jyldyń sońynda aıaqtalady dep kútilýde. Al 2017 jyly iske qosý men retteý jumystary júrgizilip, keshen paıdalanýǵa beriletin bolady.
AMÓZ-yn qaıta jańǵyrtý arqyly ekinshi retti úrdisterdiń qýattylyǵy men munaı óńdeý tereńdigin arttyrýǵa qol jetkizip, ashyq tústi munaı ónimderiniń shyǵarylýyn arttyrý, shyǵarylatyn ónim sanyn kóbeıtý, K-4 jáne K-5 ekologııalyq klastaryna saı keletin motor otyndarynyń sapasyn jaqsartý, ishki naryqta joǵary oktandy janarmaı men avıatsııalyq otyn tapshylyǵyn joıý josparlanýda. Sonymen qatar jańǵyrtýdyń arqasynda shıki munaıdy óńdeý qýattylyǵy jylyna 5,5 mln tonnaǵa deıin jetip, zaýyttyń tehnologııalyq aǵyndaryn paıdalaný senimdiligi artatyn bolady.
Premer-Mınıstr «AMÓZ» JShS bas dırektory Qaırat Orazbaevpen birge zaýyt aýmaǵyn aralap, zaýyt ınfraqurylymymen jáne hosh ıisti kómirsýtekter óndiretin qondyrǵylarmen tanysty.