Karım Benzemaǵa lańkestermen baılanysy bar degen aıyp taǵyldy

<p>Frantsýz fýtbolynyń juldyzy, 2022 jylǵy &laquo;Altyn doptyń&raquo; ıegeri Karım Benzema Izraıl men HAMAS arasyndaǵy qaqtyǵysqa baılanysty pikiri úshin basy daýǵa qaldy, dep habarlaıdy Kazinform agenttigi CNN jańalyqtaryna silteme jasap.</p>

Dúısenbi kúni Frantsııanyń ishki ister mınıstri Jerald Darmanen CNews basylymyna bergen suhbatynda Benzemany Frantsııa terrorıstik uıym dep sanaıtyn «Musylman baýyrlar» dinı-saıası tobymen (QR-da tyıym salynǵan – red. eskertpesi) baılanysy bar dep aıyptady.

Telearnaǵa bergen suhbatynda Darmanen onyń mınıstrligi 1100 ıslamshyl uıymdy japqanyn aıtty.

«Sońǵy aptalarda meni ásirese Benzema myrzanyń, bárimiz biletindeı, «Musylman baýyrlar» qozǵalysymen baılanysy bar ekeni belgili bolǵany tańǵaldyrdy», - dedi ol.

Darmanen óz málimdemesin rastaıtyn eshqandaı dálel keltirmedi. CNN Darmanen sózin aıǵaqtaıtyn túsinikteme alý úshin Frantsııanyń ishki ister mınıstrligine habarlasty.

Sársenbi kúni Frantsııa parlamentiniń senatory Valerı Býaıe mınıstr Darmanenniń málimdemesine súıenip, Karım Benzemany frantsýz azamattyǵynan aıyrýǵa shaqyrdy, dep jazdy Politico.eu.

- Mınıstrdiń málimdemesi ras bolsa, Karım Benzemaǵa qarsy sanktsııalardy qarastyrýymyzǵa týra keledi, - dedi konservatıvti Respýblıkalyq partııanyń vıtse-prezıdenti Býaıe X áleýmettik jelisinde jarııalaǵan habarlamasynda.

Býaıe Benzemany kásipqoı fýtbolshy alatyn eń joǵary jeke marapat «Altyn doptan» aıyrý - «alǵashqy sımvoldyq sanktsııa» bolýy múmkin ekenin jáne ekinshi jaza retinde ony frantsýz azamattyǵynan aıyrýdy usyndy.

Benzema ÝEFA Chempıondar lıgasyn bes ret jeńip, «Real-Madrıd» fýtbol komandasy sapynda 354 gol soqty, al ótken jazda Saýd Arabııasynyń kásibı lıgasynda óner kórsetetin «Al-Ittıhad» komandasyna aýysqan bolatyn.

Shabýylshy Frantsııa quramasynyń sapynda 97 oıyn ótkizip, 37 gol soqty jáne fýtbol tarıhyndaǵy eń myqty frantsýz oıynshylarynyń biri retinde baǵalanyp otyr. Ol ulttyq quramada 2007 jyly alǵashqy oıynyn ótkizgen, al ótken jyly Frantsııa quramasymen qosh aıtysty.

Darmanen bul sózin Benzema jeksenbi kúni Izraıl men HAMAS arasyndaǵy qaqtyǵysta palestınalyqtardy qoldaıtynyn málimdegennen keıin aıtty.

«Biz bar duǵa-tilekterimizdi áıelderdi de, balalardy da aıamaı qyryp jatqan ádiletsiz jarylystardyń qurbany bolǵan Gaza halqyna arnalady», - dep jazdy Benzema X áleýmettik jelisinde.

«Musylman baýyrlar» – ıslamdy jaı din emes, ómir súrý salty degen senimge negizdelgen dinı-saıası top (QR-da tyıym salynǵan – red. eskertpesi). Ol sekýlıarızmnen bas tartýdy jáne salaýatty otbasylardyń, qaýymdastyqtar men memleketterdiń negizi retinde Quran erejelerine qaıta oralýdy jaqtaıdy.

Demonstrant toptar ótken aptada Parıj kóshelerine shyǵyp, Frantsııa úkimetiniń elde Palestınany qoldaıtyn sherýlerge tyıym salýyna qarsy shyqty.
Darmanen qoǵamdyq tártipke alańdaýshylyq bildirip, sherýlerge tyıym salynatynyn jarııalady.

«Palestınany qoldaıtyn sherýlerge tyıym salý kerek, óıtkeni olar qoǵamdyq tártipti buzýy múmkin», - dedi mınıstr.

Ol, sondaı-aq, polıtsııany frantsýz evreıleri baratyn barlyq jerlerdi, máselen sınagogalar men mektepterdi qorǵaýǵa shaqyrdy jáne frantsýz jerinde antısemıtızm áreketterin jasaǵan kez kelgen sheteldiktiń «tez arada deportatsııalanatynyn» aıtty.