Qarǵalyda kishkentaı qyzdyń aýzy men qolyn baılap, ıesiz úıge aparyp urǵan kórshisi bolyp shyqty

ASTANA. QazAqparat – Bala quqyqtary jónindegi ýákil Dınara Zákıeva Almaty oblysynyń Qarǵaly aýylyndaǵy qyz balanyń vıdeosyna pikir bildirdi, dep habarlaıdy QazAqparat tilshisi.

«Qyz bala tabyldy. Vıdeodaǵy áıel kórshisi bolyp shyqty. Qyzdyń anasy kórshi áıel balany qaraýsyz qalǵan ǵımarattyń aýmaǵyna aparyp, alaqanymen betinen urǵanyn aıtty. Bul týraly anasyna aıtyp barsyn degen. Anasynyń sózinshe, bunyń sebebi olardyń aqshalaı qaryzy bolýy múmkin», - dep jazdy ol Facebook paraqshasynda.

Aıtýynsha, qazir balany urǵan áıel izdestirilip jatyr.

«Kórshi áıel aýyldan ketip qalǵan, ony izdestirý jumystary júrgizilip jatyr. Balamen mektep psıhology jumys isteıtin bolady», - deıdi Dınara Zákıeva.

Eske sala keteıik, jelide kishkentaı qyzdy jábirlep jatqan áıeldiń vıdeosy taraǵan bolatyn.