Qaraýsyz qalǵan qarttar balalaryna alıment tóletkizý máselesin zań júzinde kóp qozǵamaıdy - Ádilet vıtse-mınıstri

ASTANA. QazAqparat - Qazaq qoǵamynda qarttar balasyna zań júzinde talap qoıýǵa namystanady. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Ádilet vıtse-mınıstri Baqytjan Ábdiraıym málim etti.

«Qazaq qoǵamynda ata-anasyn qaraýsyz qaldyrý degen eshqashan bolmaǵan. Búgingi tańda osyndaı faktilerdi ózimiz kórip, shyn aıtý kerek, kóńilimizge qaıaý túsirip otyr. Árıne, kez kelgen ata-ana balasyna zań júzinde talap qoıýǵa namystanady. Sebebi, bul turǵyda qarttar «balasynyń qyzmetine kesiri tıe me nemese ony jaýapqa tartady ma?» degen oımen balasyna alıment tóletkizý máselesin zań júzinde kóp qozǵamaıdy. Biraq, mundaı faktiler bar, alaıda kóp emes», - dedi vıtse-mınıstr.

Onyń sózine qaraǵanda, osyndaı faktiler boıynsha sot oryndaýshylary arnaıy aınalysyp, ata-anasyna kóńil bólmeıtin, jaǵdaı jasamaıtyn balalaryn taýyp, jaýapqa tartyp jatyr.

«Buny úlken qoǵamdyq problema dep aıtýǵa bolady», - dep túıdi B. Ábdiraıym.