Qarataýda jumbaq jaǵdaıda joǵalǵan 2 jasar búldirshin meshitten tabyldy

QARATAÝ. QazAqparat - Jambyl oblysynyń Qarataý qalasynda anasy úıde joq kezde ǵaıyp bolǵan bala tabyldy, dep habarlaıdy QazAqparat polıtsııaǵa silteme jasap.

Búgin Qarataý qalasynyń polıtsııasyna 2 jasar balanyń joǵalyp ketkeni týraly habar tústi.

Balanyń anasy ony ájesimen birge qaldyryp, dúkenge ketken, al qaıtyp oralǵanda ony úıinen tappaı qalǵan.

Osy derekke qatysty QR QK 125-baby 2-bóligi 5-tarmaǵymen (adam urlaý) sotqa deıingi tergeý bastaldy.

Jambyl oblysy polıtsııa departamentiniń basshylyǵy balany tabý úshin shuǵyl Qarataýǵa bardy.

«Qońyraý túskennen keıin balany izdeı bastadyq. 80 polıtsııa qyzmetkeri, 50-den astam erikti jáne aýdannyń janashyr turǵyndary jumyldyryldy. Biz qalanyń ár buryshyn aralap, barlyq lıýkterdi qarap, jertóle men úılerdiń shatyryn súzip shyqtyq. Biz úshin eń bastysy - balany aman-saý tabý boldy», - deıdi Talas aýdandyq polıtsııa bólimi kámeletke tolmaǵandar jónindegi ýchaskelik ınspektor, polıtsııa kapıtany Janǵalı Kópjasarov.

Jedel izdestirý sharalarynyń nátıjesinde bala meshitten tabylyp, Talas aýdanynyń ortalyq aýdandyq aýrýhanasyna jetkizildi.

Denesinde eshqandaı jaraqat nemese sýyq tııý belgileri joq.

Keıin anyqtalǵandaı, úıde anasy joq kezde ájesiniń tanystary páterge kelip, alkogol ishken.

Balanyń qatty jylaǵan daýsyna shydaı almaǵan qonaqtardyń biri mas kúıinde ony kórpege orap, jaqyn mańdaǵy meshitke aparǵan.

Qazirgi ýaqytta bolǵan oqıǵanyń mán-jaıyn anyqtaý úshin tergeý júrip jatyr.