Qarataý qalasynda 60 otbasy baspanaly boldy

TARAZ. QazAqparat - Jambyl oblysy Qarataý qalasynda 1 mamyr - Qazaqstan halyqtarynyń birligi merekesine oraı «Nurly jer» baǵdarlamasy aıasynda 60 páterli kópqabatty turǵyn úı qaıta jańǵyrtýdan ótip, paıdalanýǵa berildi, dep habarlaıdy QazAqparat tilshisi.

Aıta keteıik, paıdalanýǵa berilgen kópqabatty turǵyn úıden páter alǵan 60 otbasynyń 40-y - áleýmettik az qamtylǵandar. Onyń ishinde kópbalaly - 17, tolyq emes - 15, múgedek bala asyraýshy 2 otbasy bar. Sondaı-aq, bir múgedek jáne 5 oralman otbasy páter kiltin ıelendi. Qalǵan 20 páter memlekettik bıýdjettik qyzmetkerler men qyzmettik páter ıelenýshilerine tıesili.

Qaladaǵy №5 shaǵynaýdanda oryn tepken atalmysh №55 úıge qaıta jańǵyrtý jumystaryn tarazdyq merdiger «Temir-Baılyq» JShS júrgizgen. Joba quny - 228 mıllıon 450 myń teńge. Nysan ótken jyldyń 6 maýsymynda paıdalanýǵa qabyldanyp, ınfraqurylym jelileri júrgizilgen.

Mereke qarsańynda paıdalanýǵa berilgen turǵyn úıde eki bólmeli - 10, úsh bólmeli - 30, tórt bólmeli - 20 páter bar. Atalǵan turǵyn úıge qonys aýdaratyn adamdardyń tizimin aýdandyq turǵyn úı komıssııasy jasaǵan.