Qarasora-2024: Qyzylorda oblysynda 207 esirtki quqyq buzýshylyǵy anyqtaldy
Jedel aldyn alý is-sharasy respýblıka aýmaǵynda 1 maýsym-31 qazan aralyǵynda ótkizildi.
Esirtkisi bar ósimdikterdi ósirý derekterin anyqtaýǵa, jasyryn egistikter jáne plantatsııalardy joıýǵa baǵyttalǵan is-shara barysynda 207 esirtki quqyq buzýshylyǵy anyqtalǵan. Onyń ishinde 67 esirtki ósirý, 9 ótkizý, 6 esirtkini asa iri mólsherde saqtaý, 17 jarnamalaý, 1 esirtkini tutynýǵa kóndirý jáne 172 qylmystyq teris qylyq jaǵdaıy bar.
«Zańsyz aınalymnan barlyǵy 1,2 tonna kannabıs ósimdigi, 13, 8 keli kóknár, 30,8 keli marıhýana, 1,1 keli gashısh, 57,4 gramm sıntetıka tárkilendi. Jalpy 11 myń 970 túp sora ósimdigi anyqtaldy. Al qyrkúıek-qazan aılaryna deıin 3 tonnaǵa jýyq marıhýananyń zańsyz aınalymǵa túsýine jol berilgen joq. Dalalyq aımaqtardan 19 iri esirtki alqaby, úı, baý-baqsha, saıajaılardan 48 deregi anyqtaldy. Esirtki ósirýmen aınalysqan 14 adam qamaýǵa alyndy», - dedi Qyzylorda oblysy Polıtsııa departamentiniń esirtki qylmysyna qarsy is-qımyl basqarmasy bastyǵynyń mindetin atqarýshy Ardaq Dónenov.
Atalǵan is shara barysynda qylmysyna qarsy is-qımyl basqarmasynyń qyzmetkerleri, Búrkit AJ, jyldam qımyldaıtyn arnaıy jasaq qyzmetkerleri, Іshki ister mınıstrliginiń Ulttyq ulanynyń tikushaǵymen pılotsyz ushý apparattary jumyldyryldy.
Áskerı tikushaq tehnıkasynyń kómegimen 30 márte áýeden sholý júrgizilip, esirtki ósirýdiń 11 deregi anyqtalyp, izdeýdegi qylmysker ustaldy. Іshki ister organdarynda tirkelmegen 5 zańsyz qarý alyndy.
Eske salsaq, budan buryn Qyzylorda polıtseıleri ınternet alaıaqtyqpen aınalysqan kıberqylmystyq topty ustady.