Qarasora-2022: Qostanaı oblysynda 137 esirtki qylmysy anyqtaldy

QOSTANAI. QazAqparat – Qostanaı oblysynda «Qarasora-2022» jedel aldyn alý sharasy bastalǵaly beri 137 esirtki qylmysy anyqtaldy. Bul týraly óńirlik polıtsııa departamenti esirtki qylmysyna qarsy is-qımyl basqarmasynyń basshysy Asylbek Álmaǵambetov málim etti, dep habarlaıdy QazAqparat tilshisi.

«Qarasora-2022» operatsııasy bastalǵannan beri Qostanaı oblysynyń polıtseıleri 137 qylmystyq esirtki quqyq buzýshylyǵyn anyqtady. Atap aıtsaq, 43 ótkizý, 20 kontrabanda jáne asa iri mólsherde esirtkini saqtaýdyń 7 faktisi, sondaı-aq QR Qylmystyq kodeksiniń 300-baby boıynsha (Quramynda esirtki bar ósimdikterdi zańsyz ósirý) 3 fakti anyqtaldy. Mysaly, Jitiqara qalasynyń polıtseıleri «Qarasora-2022» jedel-aldyn alý is-sharasy aıasynda esirtki zattaryn satýmen aınalysqan 32 jastaǵy turǵyndy ustady. Tintý barysynda kúdiktiniń páterinen ishinde jasyl tústi untaq zaty bar túıinshekter tabylyp, tárkilendi. Saraptama nátıjelerine sáıkes, alynǵan zattar jalpy salmaǵy 63,93 grammdy qurady. Bul iri kólemdegi «marıhýana» psıhotroptyq zaty bolyp esepteledi», - dedi Asylbek Álmaǵambetov.

Onyń aıtýynsha, búginde jitiqaralyq esirtki satýshy ustalyp, ýaqytsha ustaý ızolıatoryna qamalǵan. Qazirgi ýaqytta atalǵan fakti boıynsha sotqa deıingi tergeý jumystary júrip jatyr.

Aıta keteıik, Qostanaı oblysynyń aýmaǵynda «Qarasora-2022» jedel aldyn alý sharasy 1 maýsymnan 31 qazanǵa deıin júrgizildi.