Qarashyǵanaqta munaı óndirisiniń kólemin saqtaıtyn jobalar qolǵa alyndy

NUR-SULTAN. QazAqparat – QR Energetıka mınıstri Maǵzum Myrzaǵalıev ortalyq kommýnıkatsııalar qyzmetinde ótken brıfıngide Qarashyǵanaq ken ornynda munaı óndirisiniń kólemin saqtaıtyn jobalar týraly málimet berdi, dep habarlaıdy QazAqparat tilshisi.

«Qashaǵan ken ornynda munaı óndirý kólemi aǵymdaǵy jyldyń qorytyndysy boıynsha 15,9 mln tonna, gaz óndirý kólemi – 9,7 mlrd tekshe metr deńgeıinde bolady kútilýde.

Ken ornynda josparly kórsetkishterge qol jetkizý gaz óńdeý zaýyttaryn salý esebinen qamtamasyz etiledi. Bul zaýyttar jylyna qosymsha 3 mlrd tekshe metr taýarlyq gaz óndirýge jáne munaı óndirisin jylyna 16 mln tonnadan 20 mln tonnaǵa deıin ulǵaıtýǵa múmkindik beredi», - dedi Maǵzum Myrzaǵalıev.

Onyń aıtýynsha, Qarashyǵanaq ken ornynda óndiris kólemin azaıtpaı ustap turýǵa basymdyq berilmek.

«Qarashyǵanaq ken ornynda munaı óndirý kólemi 11,6 mln tonna, gaz óndirý kólemi 18,7 mlrd tekshe metr boldy. Búgingi tańda Qarashyǵanaqta suıyq kómirsýtekterdi óndirý deńgeıin jylyna 11-12 mln tonna sheginde ustap turýǵa múmkindik beretin jobalar iske asyrylýda.

Birinshi. Quny 1,1 mlrd dollar bolatyn «Gaz óńdeý qýattaryn ulǵaıtý» jobasy. Búginde ol paıdalanýǵa berildi.

Ekinshi. Quny 578 mln dollar blatyn «Gazdy keri aıdaýdyń 4-shi kompressoryn salý» joabsy. Qazirgi ýaqytta qurylys-montajdaý jumystary aıaqtaldy, iske qosý-retteý jumystary júrgizilýde.

Úshinshi. «Gazdy keri aıdaýdyń 5-shi kompressoryn salý» jobasy. Onyń bıýdjeti – 970 mln dollar. Aıaqtalý merzimi – 2025 jyl», - dedi vedomstvo basshysy.