Jambyl oblysynyń ákimi ónim kórsetkishin nege asyryp kórsetti

<p>TARAZ. KAZINFORM &mdash; &nbsp;Bıylǵy shildede oblystyq máslıhattyń sessııasynda Jambyl oblysynyń ákimi Erbol Qarashókeev baıandama jasap &laquo;2023 jyly &bdquo;AlelAgro&ldquo; AQ oblysta qus eti sharýashylyǵyn damytý úshin quny 25,6 mlrd teńge turatyn, jylyna 135 myń tonna qus etin shyǵaratyn jobany iske qosty, osynyń nátıjesinde 100 jańa jumys orny quryldy&raquo; degen naqty málimet keltirgen. Alaıda bir qyzyǵy, &laquo;Alel Agronyń&raquo; ózi jylyna 135 myń tonna qus etin óndirip otyrsa da, Jambyl oblysy 2023 jyly &laquo;Qus etiniń óndirisi&raquo; nysanaly ındıkatoryn oryndaı almaǵan. ıAǵnı, Jambyl oblysyna 20 myń tonna qus etin óndirý jospary berilse, sonyń 17,2 myń tonnasy ǵana oryndalǵan.</p>

Sonda málimette kórsetilgen 135 myń tonna qus eti qaıda? Osyndaı kólemmen Jambyl oblysy qus etiniń ındıkatoryn nege oryndaı almaǵan?

Osy suraqty oblystyq máslıhattyń depýtattary sessııada naqty qoısa da, oblys ákiminiń ózi de, orynbasary da, tipti aýylsharýashylyǵy basqarmasynyń basshylary da bir-birine siltep, 135 myń tonna qus etiniń qaıdan shyqqanyn sol kúıi túsindirip bere almady. 

Al osy kásiporynnyń resmı saıtynda bylaı jazylǵan:

«Alel Agro» aktsıonerlik qoǵamy — broıler qusyn shyǵaratyn jáne ótkizetin Qazaqstandaǵy iri óndiris kompanııasy. Kásiporynnyń jyl saıynǵy óndiris qýaty — 60 myń tonna ónim». 

ıAǵnı, 135 myń tonna týraly múldem sóz joq. Qazaqstan boıynsha qýaty jylyna 60 myń tonna eken. Endeshe Jambyl oblysy ákiminiń baıandamasyna 135 myń tonna qus eti qaıdan enip ketti, bul málimetti nege súıenip aıtty jáne ne úshin kerek boldy, ol jaǵy árıne, belgisiz. 

Endi 25-qyrkúıek kúni ótken oblystyq máslıhatynyń sessııasynda Jambyl oblysy ákiminiń baıandamasynda «Alel-Agro» AQ 4 mlrd teńgege ınkýbator qurylysy boıynsha 1 jobany qolǵa alyp jatqany týraly málimet keltirildi. 

Mine, osy aptada shynynda Taraz qalasynda «Alel Agro» AQ Jambyl fılıalynyń óndiristik ınkýbatory iske qosyldy. Biraq quny 4 mıllıard emes, 2 mıllıard 689 mıllıon teńgeni quraıtyn óndiristik ınkýbator zamanaýı qural-jabdyqtarmen qamtylǵan.

Jylyna 38 mıllıonǵa jýyq balapan shyǵarýǵa qaýqarly óndiris orny 50 adamdy turaqty jumyspen qamtıdy. Sondaı-aq ınkýbatorǵa qajet shıkizattar kompanııanyń óz óndirisi arqyly júzege asyrylady.

Al ónimdi negizgi ótkizý kózderi — «Alel Agro» AQ-nyń menshigindegi qus fabrıkalary men fermerlik qojalyqtary. 

Árıne, «Alel Agro» AQ — elimizdegi irgeli jáne tabysy kún saıyn artyp kele jatqan kásiporyndardyń biri. Tek jambyldyq sheneýnikterge typ-tynysh qana tirligin istep júrgen «Alel Agro» AQ-nyń kórsetkishterin tym asyra kórsetý ne úshin kerek bolǵany túsiniksiz.

135 myń tonna qus etiniń deregi sol kúıi tabylmady, al, oblys ákimi aıtqandaı osy 25,6 mlrd. teńge turatyn joba boıynsha 100 adam jumysqa turdy ma, joq pa, ony da árıne, dáleldeý qıyn.

Aıta ketsek, buǵan deıin Qazaqstan aımaqtarynda qus etiniń baǵasy qansha ekenin jazǵan bolatynbyz.