Qarasaı men Aǵyntaı batyrlarǵa ornatylǵan keshenge jóndeý júrgizý qajet - Erǵalıev
«Elbasynyń «Bolashaqqa baǵdar: Rýhanı jańǵyrý» atty tereń oıly fılosofııalyq eńbeginde «Bizdiń babalarymyz ǵasyrlar boıy ushqan qustyń qanaty talyp, júgirgen ańnyń tuıaǵy tozatyn ulan-ǵaıyr aýmaqty ǵana qorǵaǵan joq. Olar ulttyń bolashaǵyn, keler urpaǵyn, bizdi qorǵady. San taraptan suqtanǵan jat jurtqa Atamekenniń qarys qadamyn da bermeı, urpaǵyna mıras etti», - degen oıyn alǵa tartyp, Úkimettiń nazaryn Qazaqstannyń soltústik óńirindegi, Kókshetaýdan júz jıyrma shaqyrym jerdegi, Soltústik Qazaqstan oblysynyń Aıyrtaý aýdanynyń aýmaǵyndaǵy eń bir eńseli ári aıbatty Qazaqtyń Qarasaı batyry men Aǵyntaı batyrlarǵa ornatylǵan memorıaldyq keshenniń qazirgi jaǵdaıyna aýdarǵym keledi», - dep atap ótti ol.
Senatordyń aıtýynsha, bul memorıaldyq kesene 17 ǵasyrda Esimhannyń bastaýymen qazaq jerin shapqynshylardan qorǵaǵan ataqty Qarasaı men Aǵyntaı batyrlar jerlengen Qulshynbaı-tóbesine 1999 jyly Elbasynyń tikeleı qamqorlyǵymen jáne qoldaýymen salynǵan bolatyn. Qazaqtyń qos batyry jerlengen bıik tóbedegi Qarasaı men Aǵyntaı batyrlardyń memorıaldyq kesheni babalarymyzdyń batyrlyǵyn pash etip asqaqtap tur. Bul jerde jaýyngerlerdiń kóptegen molalary da bar. Áli de qazba jumystary júrgizilýde. Byltyr kezekti qazba jumystary kezinde boıy eki metrdeı bolatyn aýyr semserimen birge jerlengen taǵy bir batyrdyń súıegi tabyldy.
«Arhıtektýralyq jaǵynan qaıtalanbas sheberlikpen salynǵan bul memorıaldyq keshendi kórýge jyl saıyn elimizdiń túpkir-túpkirinen myńdaǵan adamdar, kóptegen sheteldik qonaqtar keletin týrıstik orynǵa aınalyp otyr. Sol aǵylyp kelip jatqan adamdarǵa arnalyp keseneniń janynan meımanhana da salynǵan bolatyn. Jáne de kesenege mektep oqýshylary, jas otaý ıeleri keledi, osy jerden jastardy áskerge shyǵaryp salý da ıgi bir dástúrge aınaldy. Kezinde Qarasaı men Aǵyntaı batyrlar jaıly tarıhı zertteýler júrgizip jáne de «Qarasaı batyr» qoǵamdyq qoryn basqaryp, osy kesene salý jumystarynyń basy-qasynda júrgendikten de, osy keseneniń qazirgi jaǵdaıyna beı-jaı qaraı almas edik. Óıtkeni, qazirgi ýaqytta osy memorıaldyq keshenniń batyrlar kesenesine jóndeý jumystary qajet. Keseneden sý ketip jatqanyna da kóp boldy. Sonyń saldarynan keseneniń keı jerleriniń kirpishteri úgitilip, shashylýǵa da aınaldy. Jáne de Elbasy «Bolashaqqa baǵdar: Rýhanı jańǵyrý» eńbeginde bylaı dep jazdy: «Týǵan jer» baǵdarlamasynan bólek, biz halyqtyń sanasyna odan da mańyzdyraq jalpyulttyq qasıetti oryndar uǵymyn sińirýimiz kerek. Ol úshin «Qazaqstanyń qasıetti rýhanı qundylyqtary» nemese «Qazaqstannyń kıeli jerleriniń geografııasy» jobasy kerek. Árbir halyqtyń, árbir órkenıettiń barshaǵa ortaq qasıetti jerleri bolady, ony sol halyqtyń árbir azamaty biledi. Bul rýhanı dástúrdiń basty negizderiniń biri». Mine, osy bir bir qaǵıdaǵa súıene otyryp, Qarasaı men Aǵyntaı batyrlardyń memorıaldyq kesenesiniń de aldaǵy ýaqytta jasalar «Qazaqstannyń qasıetti rýhanı qundylyqtary» nemese «Qazaqstannyń kıeli jerleriniń geografııasy» tizimine de engizilýge de ábden laıyqty dep sanaımyz»,- dedi Erǵalıev.