Karantınge qaramaı toı jasaǵan Jańabylovtarǵa aıyppul salyndy

NUR-SULTAN. QazAqparat – Nur-Sultan qalasy Esil aýdandyq sanıtarlyq-epıdemıologııalyq basqarmasy Dilu PLAZA meıramhanasynda karatınge qaramaı toı ótkizgenderge qandaı shara qoldanylǵanyn málim etti, dep habarlaıdy QazAqparat tilshisi.

«13 tamyzda Nur-Sultan qalasy Esil aýdandyq polıtsııa basqarmasynan Dilu PLAZA meıramhanasynda 9 tamyz kúni úılený toıy bolǵany jáne ony Islam Jańabylov pen Erbolat Jańabylov uıymdastyrǵany týraly materıaldar kelip tústi. Islam Jańabylov atalǵan otbasylyq is-sharany uıymdastyrýshy retinde kinásin moıyndap, Ákimshilik quqyq buzý týraly kodekstiń 425-baby 1-bóligi boıynsha 87 510 teńge (30 AEK) aıyppul tóleıtin boldy. Al Erbolat Jańabylov toıdy uıymdastyrmaǵanyn, tek qonaq retinde qatysqanyn málim etti. Qoǵamdyq orynda betperdesiz júrgeni úshin Erbolat Jańabylov ta 87 510 teńge aıyppul arqalady», - dep jazylǵan basqarmanyń baspasóz qyzmeti taratqan aqparatta.

Quzyrly organ Jańabylovtardyń kinásin moıyndaǵanyn eskerip, 7 táýlik ishinde salynǵan aıyppuldyń teń jartysyn, ıaǵnı 43 755 teńgeden tóleýge múmkindik berdi.

Al osy toıdyń ótýine jol bergen Dilu PLAZA meıramhanasynyń ıesine qatysty kelip túsken materıaldar Esil aýdanynyń sanıtarlyq-epıdemıologııalyq baqylaý basqarmasynyń qaraýynda jatyr.

Eske salsaq, karantın talaptaryna qaramastan toı jasaǵan astanalyqtar Instagram blogerleriniń jazbasynan keıin áshkere bolǵan edi.