Karantındi elemegen astananyń «Alanya» baryna túbegeıli sharalar qoldanyla bastady
Nur-Sultan qalasy 10 naýryzdan bastap koronavırýs boıynsha epıdemıologııalyq ahýaldy baǵalaý matrıtsasyna sáıkes, «qyzyl» aımaqqa endi. Osyǵan oraı, mobıldik toptardyń jumysy kúsheıtilgen rejımge kóshirildi.
«Eskertý jasalǵanyna, sol sııaqty ákimshilik jaýapkershilikke tartylǵanyna qaramastan elordanyń keıbir mekemeleri karantın rejıminiń talaptaryn elemeıdi jáne olardy júıeli túrde buzyp keledi. Olardyń arasynda Esil aýdanynda ornalasqan «Alanya» karaoke-meıramhanasy bar», - deıdi qala ákimdiginiń baspasóz qyzmetinen.
Málim etilgendeı, Nur-Sultan qalasynyń mamandandyrylǵan aýdanaralyq ákimshilik sotynyń bıylǵy 12 aqpandaǵy qaýlysymen «Alanya» karaoke-meıramhanasynyń qyzmeti bir aı merzimge toqtatyldy.
«Alaıda mekeme basshylyǵy sot sheshimin elemeı, jumysyn ary qaraı jalǵastyrdy.
Joǵaryda baıandalǵandy eskere otyryp, osy jyldyń 25 naýryzynda Nur-Sultan qalasy Ádilet departamentiniń sot oryndaýshysy meıramhananyń kirý esikterine mórlengen belgi qoıdy. Al «Astana-AEK» AQ qyzmetkerleri elektr jelisinen ajyratty.
Kásipkerlik sýbektileri karantın rejıminiń talaptaryn jáne shekteý sharalaryn qatań saqtaýy tıis», - dedi ákimdikten.