Karantındegi juldyz: Batyrhan Shúkenovti eske alý kontserti ótedi
«Onlaın kontsert barysynda qazaq estradasynyń belgili ártisteri Roza Rymbaeva, Saǵynaı Abdýllın, Nadjıb Vıldanov, Renat Gaısın, Janar Duǵalova, Rústem Nurjigit, Dınaıa, Álı Oqapov, Syrymtaı Eńsepov tikeleı efırde Batyrhan Shúkenovtiń repertýaryndaǵy ánderdi oryndaıdy», - dep atap ótedi Mádenıet mınıstrliginiń baspasóz qyzmetinen.
Esterińizge sala ketsek, 23 naýryzdan bastap mınıstrliktiń bastamasymen Qazaqkontsert pen Qazaqtelekom uıymdary birlesip, Live formatyndaǵy «Karantındegi juldyz» atty jańa jobany bastady. Onyń aıasynda tanymal qazaqstandyq óner juldyzdary men Qazaqkontserttiń ártisteri jandy daýysta jáne onlaın formatta óner kórsetedi. Ónersúıer qaýymǵa ártúrli baǵyttaǵy – folklorlyq, estradalyq, klassıkalyq jáne ult aspaptyq oryndaýda kontsertter usynylady.
Jobanyń basty artyqshylyǵy – kórermen qaýym súıikti ánshileriniń ónerin úıdegi jaıly atmosferada tamashalaı alady.
Osy kúnderi Roza Rymbaeva, Sáken Maıǵazıev, Medeý, Jeńis Seıdýllauly, Jubanysh Jeksenuly, Ǵadilbek Jańaı, Bekbolat Tileýhan, Qurmash Mahanov pen Ámire, Tolqyn Zabırova, Ardaq Balajanova men Klara Tólenbaeva syndy belgili ánshiler ózderiniń onlaın kontsertterin berip úlgerdi.
26 naýryz kúni ótken Roza Rymbaevanyń onlaın kontsertin Memleket basshysy halyqtyń rýhyn kóteretin naǵyz óner týyndysy dep baǵalady.