Karantındegi qaıyrymdylyq: Nur-Sultanda áskerı qyzmetshiler qan tapsyrdy
«Búgin «Biz birgemiz» baǵdarlamasy aıasynda qanǵa muqtaj azamattarǵa kómektesý úshin jınalyp otyrmyz. Tańǵy 9-dan bastap áskerıler qan tapsyryp ketedi. Bizdiń bólimsheden 100-ge jýyq áskerı qyzmetshi keldi. Jeke quramnyń barlyǵy medıtsınalyq tekserýden ótken. Bizdiń áskerıler arasynda turaqty donorlar da bar», - dedi 55/765 áskerı bólimi komandıriniń orynbasary Maqsat Katchıbaev tilshilerge bergen suhbatynda.
Ortalyqtyń donor bóliminiń meńgerýshisi Elmıra Kópeeva karantın kezinde qan tapsyrýdyń qanshalyqty mańyzdy ekenin aıtyp berdi.
«Telearnalardyń birine reportaj ázirlep, karantın rejımine qaramastan, turǵyndardy qan qoryn toltyrýǵa shaqyrǵan edik. Alǵashqylardyń biri bolyp, Qorǵanys mınıstrligi ún qatty. Dál qazirgi ýaqytta donorlar asa qajet. Karantınge deıin kúnine 100-120 donor keletin bolsa, qazir bul kórsetkish 40 paıyzǵa deıin azaıdy. Qazir de turǵyndar ortalyqqa kelip, qan tapsyra alady. Barlyq sanıtarlyq talaptar qatań saqtalady. Kólikpen qıyndyq týyndasa, ortalyq mamandaryn úıge shaqyrýǵa da bolady», - dedi E. Kópeeva.
Aıta keteıik, 18 jasqa tolǵan, sozylmaly júrek-qan tamyr aýrýlary, V, S gepatıti, teri aýrýlary joq azamattar qan donory bola alady.