Karantındegi aýyl: Aqmola oblysynda túınemeniń qaıdan shyqqany anyqtalyp jatyr

KÓKShETAÝ. QazAqparat – Aqmola oblysynyń Úshqarasý aýylynda túıneme aýrýynyń tirkelýi boıynsha jarııalanǵan karantın qyrkúıektiń 14-de aıaqtalýy tıis. Qazirgi kezde jaǵdaı turaqty, alańdaýǵa esh negiz joq, mamandar túınemeniń qaıdan shyqqanyn anyqtap jatyr. Bul týraly oblystyq veterınarııa basqarmasynyń basshysy Talǵat Júnisov málim etti, dep habarlaıdy QazAqparat tilshisi.

Basqarma basshysynyń aıtýynsha, túınemeniń (sibir jarasy) taralýyna baılanysty túrli nusqa bar. Olardyń barlyǵyn joqqa shyǵarýǵa bolmaıdy.

«Jýyrda BAQ-ta túınemeniń borsyq arqyly taraǵany týraly aqparat shyqty. Biz ony joqqa shyǵarmaımyz. Infektsııa kózi borsyq, shóp jáne astyq bolýy múmkin. Bulardyń barlyǵynan synamalar alynyp, zerttelip jatyr. Biraq ázirge naqty aqparat joq», - deıdi Talǵat Júnisov QazAqparat tilshisiniń saýalyna.

Basqarma basshysy atap ótkendeı, 30 iri qaraǵa qarasan tıip, 536 keli et tárkilendi. Aýrý mal men et mal qorymynda órteý jolymen joıyldy.

«Karantındik sharalardyń nátıjesinde aýyldaǵy ózge iri qaranyń qarasanǵa shaldyǵý deregi tirkelgen joq. Karantın tamyzdyń 31-de jarııalanyp, qyrkúıektiń 14-de alynady. Ázirge alańdaýǵa esh negiz joq», - dep tolyqtyrdy Talǵat Júnisov.

Aıta ketsek, budan buryn aqmolalyq dárigerler túıneme juqtyrǵan naýqastardyń jaǵdaıy týraly aıtqan edi.