Karantın jeńildedi: Qostanaılyq oqýshylar úıirmeler men qosymsha sabaqtarǵa bara alady

QOSTANAI.QazAqparat – Qostanaı oblysynda karantın sharalarynyń jeńildeýimen bilim berý uıymdarynyń jumysyna ruqsat etildi, dep habarlaıdy QazAqparat tilshisi oblys ákimdigi janyndaǵy jedel shtabqa silteme jasap.

Qostanaı oblysynda karantın rejımin kezeń-kezeńimen jeńildetý týraly óńirdiń bas sanıtar dárigeri qaýly qabyldaǵan bolatyn.

Osyǵan baılanysty bilim berý uıymdarynyń jumysyna da ózgeris endi. 2021 jylǵy 8 aqpannan bastap arnaıy, mamandandyrylǵan mektepterdiń, erekshe bilim alýyna qajettiligi bar balalarǵa arnalǵan mektep-ınternattardyń (onyń ishinde ata-anasynyń qamqorlyǵynsyz qalǵan jetim balalarǵa arnalǵan), jalpy úlgidegi mektep-ınternattardyń, daryndy balalarǵa arnalǵan mektep-ınternattardyń qyzmetine ruqsat berildi.

«180 adamǵa deıingi kontıngenti bar mektepterde ata-analarynyń ótinishi boıynsha mektepaldy jáne 1-4 synyptar úshin kezekshi synyptar uıymdastyrylady. Synyptarda 15-ke deıin ǵana balalar qabyldanady. Qalǵan synyptar qashyqtan bilim alady. Tehnıkalyq jáne kásiptik bilim berý uıymdarynyń stýdentteri tek qashyqtan oqytylady. Bilim berý ortalyqtarynyń, túzetý, ońaltý jáne beıimdeý kabınetteriniń (ortalyqtarynyń) qyzmetine aldyn ala jazylý boıynsha ruqsat beriledi. «Baldáýren» respýblıkalyq oqý-saýyqtyrý ortalyǵy jáne «Bóbek» ulttyq ǵylymı-praktıkalyq bilim berý jáne saýyqtyrý ortalyǵy jumysyn jalǵastyrady», delingen qaýly mátininde.

Qostanaılyq oqýshylar 8-shi aqpannan bastap úıirmeler men qosymsha sabaqtarǵa barýǵa múmkindik aldy. Biraq toptarda kelýshiler sany 15 adamnan aspaýy tıis. Jumys rejımi 9:00-den 20:00-ge deıin belgilendi. Olardyń jumysy jeksenbi jáne mereke kúnderi toqtatylady.