Karantın: Túrkistanda besik toı jasaǵan turǵyn jaýapkershilikke tartylmaq
11:24, 19 Shilde 2021
TÚRKІSTAN. QazAqparat - Túrkistan oblysynda karantın talaptaryn óreskel buzyp, besik toı jasaǵan turǵyn anyqtaldy. Bul týraly QazAqparat oblystyq polıtsııa departamentine silteme jasap habaraıdy.
Maqtaaral APB-nyń qyzmetkerleri saǵat 11:40 shamasynda Maqtaaral aýdanynyń kósheleriniń birinde ornalasqan toıhanada besik toıyn ótkizip jatqanyn anyqtady. Toıǵa 80-nen astam adam jınalǵan. Mobıldik top turǵyndarǵa túsindirme jumystaryn júrgizip, toıdy der kezinde toqtatyp, adamdardy úılerine tarqatty.
Karantın talaptaryn elemegen toı ıesine qatysty QR ÁQBtK-niń 425-baby «Halyqtyń sanıtarlyq-epıdemıologııalyq salaýattylyǵy salasyndaǵy zańnama talaptaryn, sondaı-aq gıgıenalyq normalardy buzý» boıynsha is-qujattar jınaqtalyp, zańdy sheshim qabyldaý úshin Maqtaaral aýdandyq SEBB-ǵa joldandy.